Artículu d'opinión de Miguel Fernandi
11 abr 2018 . Actualizado a las 15:03 h.Anda l’oviedismu contento. Sí, esta ye la selmana de tar contentos depués de pensar que too acabara. Ansí ye l’oviedismu, ansí ye’l fútbol y, por supuestu, la Segunda División. Tas dos selmanes ensin ganar y poco te faltó pa mandar la bufanda a Cogersa… pero vas al campu d’un rival directu y ganes y gastasti media paga na tienda del Oviedo.
Bueno, nin tan mal, porque aprovechasti la visita a la tienda pa comprar un par d’entraes d’acompañante pa esos amigos que nun s’acaben d’enganchar al día a día pero que quies convencelos de lo guapo que ye dir a velo en directo. Siempre digo qu’hai que respetar al sociu y tener munchu güeyu colos precios pero al club nun-y quedaba otra. Pelo civil o pelo criminal pero hai que meter más xente tovía nel Tartiere.
Volviendo a lo contento que ta l’oviedismu, nun ye namás por ganar en Lugo. Yá tan xugando los buenos, sí, tardó pero l’oviedismu yá esfruta de ver en campu a la vez a Berjón, Fabbrini y Aarón (nun fui quién a facer un xuegu de lletres d’estos que tan de moda nel fútbol modernu). Y tan contentos porque l’Oviedo será otra cosa, meyor o pior, pero otra cosa anque nun tengo dulda de que nun perderá la so identidá.
Colos trés ‘engaches’ seguro que Toché (y Linares cuando-y toque) vivirá más feliz, tará más nel aria, rematará más y tendrá que buscase menos la vida. Ye probable que Folch sude un poco más na defensa pero lo del catalán ye un espectáculu… y si requier ayuda tien agora’l llau a un paisano que ye cementu armao keniata. Y sinón tará un Rocha que ta rindiendo pencima de lo esperao en veranu cuando paecía mas fuera que dientro.
Forlín siguirá siendo’l Comandate y Carlos el so escuderu qu’apunta a pichichi. Quiciás los llaterales subirán menos pero siempre podrá cambiase’l dibuxu o que Diegui y Mossa tengan otru tipu de papel nes segundes partes.
Si alguién tenía duldes, la parada antolóxica d’Alfonso en Lugo tendrá que quitales de la portería. Un Alfonso con futuru al que tolos díes ayuda a meyorar un profesional intachable como Juan Carlos.
Sí, queden más nomes na plantiya. Ehí ta la Bala de Llaviana o los que tienen menos participación. Habrálos meyores o piores pero nengún niega l’esfuerzu ente selmana anque lleve meses ensin xugar más allá del partíu contra’l filial.
Ye’l momentu de los buenos, de los que salen nes fotos como diz Anquela. Pero ye’l momentu de toos, de los que xueguen y de los qu’animen. Ye’l momentu hasta de los que van poco al estadiu. ¡Ye’l momentu!
