Gastrollar 2025 va celebrase los díes 16 y 17 de xunu na Montaña Central d'Asturies

Raúl Alonso REDACCIÓN

AGORA

Cartel de Gastrollar 2025
Cartel de Gastrollar 2025 @gastrol.lar

L'eventu va tener llugar en dos enclaves representativos del territoriu: La Ribera y Ayer

11 jun 2025 . Actualizado a las 14:15 h.

La comarca de la Montaña Central d'Asturies prepárase p'acoyer una nueva edición de Gastrollar, el congresu gastronómicu de referencia nel mediu rural asturianu, qu'esti se celebra los díes 16 y 17 de xunu sol lema «Afayando la cocina del carbón». L'eventu va tener llugar en dos enclaves representativos del territoriu: La Ribera y Ayer, onde se va desenvolver un intensu programa que combina formación especializada, showcookings, alderiques, esperiencies al rodiu del productu local y un decidíu apueste pola gastronomía sostenible y de quilómetru cero.

El llunes 16, la sede del congresu va emplazase nel conceyu de La Ribera na Central Artística de Güeñu, y dalgunos de los nomes y actividaes más destacaos son:

David Mora, director del Máster de Turismu Gastronómicu de Basque Culinary Center, va compartir reflexones sobre ‘El turismu gastronómicu del carbón como opción’.

Carlos Caxellos, Premiu Michelín al chef mozu 2025, va presentar la so visión de la vanguardia culinaria de proximidá del so restorán ‘Barro’ (1 estrella Michelín,1 estrella Verde, 1 sol Repsol).

Brais Pichel, chef del restorán Terra (1 estrella Michelín, 1 sol Repsol), va llegar dende Fisterra (A Coruña) col so showcooking 'Cocinar y fermentar A Mariña da Morte'.

Lara Roguez, chef del restorán Abarike (Xixón) va protagonizar otru de los momentos clave col showcooking ‘El pexe de rula con artes sanos nel platu’, nuna acción impulsada por OPASTURIAS (Organización de Productores Artesanales del Principáu d'Asturies) col sofitu del FEMPA (Fondu Européu Marítimu, de Pesca y Acuicultura) y el Principáu d'Asturies.

Lola Palacio ya Iñaki Gómez (Restorán Alenda, 1 sol Repsol) que van abrir la xornada cola ponencia ‘Alenda: un proyectu de vida’.

La xornada del llunes va cerrar cola grabación en directu del reconocíu podcast gastronómicu «La Picaeta» entrevistando a la familia Manzano, referente absolutu de la cocina asturiana con trés estrelles Michelín (Casa Marcial, Les Arriondes), la postrera d'elles llograda en 2024. Amás, a lo llargo de tola xornada del llunes, nel esterior de la Central Artística de Güeñu va celebrase un showroom - mercáu de productos artesanales de proximidá y de la marca de garantía y calidad Alimentu del Paraísu, titularidá del Principáu d'Asturies.

Yá'l martes 17, el protagonismu treslládase al conceyu d'Ayer onde se va vivir una xornada dedicada a la gastronomía tradicional y el productu de cercanía. Van tener llugar diversos talleres, por casu, sobre'l pan d’escanda en fornu de lleña, la visita a les instalaciones del Aula d'Esperiencies Olaya Miel, o la presentación de proyectos emerxentes de la contorna. Amás, vamos esfrutar d'un simbolicu Hermanamientu del Carbón aderezáu con una xinta gastronómica ufiertada poles cases de comida Ca’l Xabú (Ayer) y El Pintu (Llaviana). El broche final del día va tar al cargu de Berto Díaz (Patio de Butacas, Siero) y Jorge Palacios (Fango, Ávila) col taller de coctelería de raigañu «Gastronomía líquida».

Como aperitivu a esta cita, ente'l vienres 13 y el domingu 15 de xunu celébrense, per segundu añu consecutivu, les Gastrollar Sessions, unes xornaes complementaries nes qu'establecimientos de tola Montaña Central ufierten esperiencies gastronómiques úniques p'afayar «la cocina del carbón» dende múltiples enfoques. Menúes especiales, cocina en vivu, mercaos artesanos, productos locales y degustaciones esclusives pa calecer los fogones de Gastrollar2025.