Os estadounidenses, tradicionalmente preocupados pola política interior, votarán este martes coa mirada posta en Oriente Medio
05 nov 2024 . Actualizado a las 13:05 h.A poucos días da votación nos Estados Unidos, os datos das enquisas reflicten unha competencia moi axustada, especialmente nos estados chave que determinarán quen ocupará a presidencia. Historicamente, o cidadán estadounidense priorizou a política interior na súa decisión de voto. En consecuencia, asuntos como a inflación, o aborto e a inmigración teñen protagonizado esta campaña. Paradoxalmente, estas eleccións poderían acabar determinadas polo papel da Casa Branca en Oriente Medio.
A renuncia como candidato do actual presidente, Joe Biden, en favor da súa vicepresidenta, Kamala Harris, permitiu aos demócratas tomar a dianteira nunha competencia claramente dominada ata entón polo expresidente e candidato republicano Donald Trump, tras a súa épica reacción nun intento de asasinato. Neste sorpaso tería xogado un papel fundamental o compromiso demócrata de restituír a protección federal do dereito ao aborto, eliminada polo Tribunal Supremo no 2022. Porén, a falta de concreción nas medidas propostas podería ameazar coa perda do apoio da denominada «sociedade civil».
Para aqueles que vivimos nese país, resulta inevitable destacar o protagonismo deste sector, un denso entramado de organizacións non gobernamentais capaces de influír directamente no proceso político. As dúbidas suscitadas polas promesas de Harris sobre o aborto súmanse ao rexeitamento activo que a sociedade civil veu manifestando, de forma insistente e visible, en relación co apoio incondicional ao Goberno israelí por parte do estadounidense. As protestas dentro e fóra das convencións e mítines demócratas, acusando con dureza tanto ao partido como ao Goberno de complicidade no xenocidio do pobo palestino, non deixaron de sucederse desde a proclamación da candidata. A recente expulsión en Míchigan do influente activista demócrata musulmán Ahmed Ghanim levantou todas as alarmas, lembrando que foi precisamente a perda do apoio musulmán nos estados chave un dos factores determinantes na derrota da demócrata Hillary Clinton fronte a Donald Trump no 2016. En Míchigan, a derrota cifrouse en 10.000 votos menos, do 10 % da poboación libanesa e palestina con dereito a voto alí.
Pola súa banda, o candidato republicano continúa gañando apoios entre a poboación, buscando equiparar a economía demócrata coa inflación e amplificando as preocupacións sobre a entrada masiva de inmigrantes pola fronteira sur para atraer —paradoxalmente para un europeo— o apoio da poboación latina. As súas posibilidades poderían verse incrementadas, ademais, pola súa capacidade para posicionarse nos podcasts máis influentes entre a poboación masculina, incluíndo a afroamericana, así como polo apoio de compañías e magnates tecnolóxicos. O recente mitin no Madison Square Garden de Nova Iorque suxire que Trump podería estar logrando mobilizar emocionalmente ao electorado en torno a un proxecto esperanzador de país que busca recuperar o esplendor perdido. Pero a campaña aínda está aberta: nos Estados Unidos, todo pode pasar.