El Conceyu reivindica la oficialidá y l'aportación de la inmigración nel Día de la Llingua Materna

El conceyal de Cultura, Roberto Sánchez Ramos, reivindicó esti xueves la declaración del asturianu como llingua oficial y les diverses nacionalidaes que viven n'Uviéu «que nos arriquecéis cola vuestra presencia».

Sánchez Ramos señalólo asina esti xueves nel so discursu nel actu institucional de celebración del Día de la Llingua Materna entamáu pol Conceyu d'Uviéu y que tuvo presidíu pol alcalde, Wenceslao López, informa Europa Press.

Nel actu quixo destacar l'aportación cultural de los 3.000 migrantes que viven na ciudá que, a xuiciu de Sánchez Ramos, «arriquécennos cola so presencia». Nesi sentíu, destacó qu'Uviéu ye una ciudá que quier «trabayar pola integración y lluchar contra los fascismos de cuñu nuevu que pretenden esclavos y non persones humanes».

Tamién punxo en valir la diversidá de llingües y la necesidá de que les instituciones públiques fomenten esti patrimoniu. Asina, afirmó qu'Asturies tien una llingua propia y que son necesarios "impulsos nuevos" pa la so normalización «que pasen pela oficialidá».

Nel actu residentes n'Uviéu d'hasta 12 nacionalidaes lleeron poemes na so llingua materna. Amás, lleóse un manifiestu a favor de la diversidá llingüística pol presidente de l'Academia de la Llingua, Xosé Antón González Riaño, y el saharah.ui residente n'Asturies Aby Atham.

Tamién se cuntó cola actuación del gaiteru Xuacu Amieva y del colectivu Muyeres, qu'interpretaron un cantar con partes n'inglés y asturianu que reivindicó que les xeneraciones nuevan puedan deprender asturianu d'una manera integral nel sistema educativu y que remató pidiendo la oficialidá.

---

---

---