El SEPA, Serviciu d’Emerxencies del Principáu d’Asturies ye’l muérganu del que depende’l 112 Asturies. El teléfonu de baldre d’emerxencies y urxencies de proteición civil, d’estinción de fueos y salvamentu nel ámbitu territorial de la comunidá autónoma asturiana.
Agora amás del castellanu, inglés y francés, pue tornar 51 llingües más, sacante l’asturianu. Consultáu’l SEPA telefónicamente por esta anomalía, retruca con un curtiu y ambiguu: «Tamos nello».
Atienden 24 hores al día tol añu. Ufre un accesu automatizáu que contauta con un intérprete na llingua del que llama al traviés de la llinia 112. Fai un serviciu perimportante con una media de 2.000 llamaes diaries (2024).
Ye tamién el númberu de teléfonu d’emerxencies en tola XE.
Hasta l’añu pasáu, el 112 garantizaba la rempuesta n’inglés y francés, que son los idiomes desixíos a los coordinadores del serviciu. Amás, agora traduz a 51 idiomes como’l farsi, bambara, suniqui, wolof, poular urdu, mandinca, xeorxianu y siriu. Tamién al gallegu, eusquera y catalán.
Un serviciu asturianu perimportante’l teléfonu 112, pero que pel momentu nun ufierta torna a los asturfalantes ente les otres 51 llingües non oficiales n’Asturies, nes que sí ye quien a faelo.
A ver si entaínen na igua tan necesaria d’incluyir l’asturianu.
Sobremanera al ser un serviciu pa tolos qu’habiten Asturies n’especial nes sos zones rurales y de montaña, que ye onde fai muncha y bona xera.