El Congresu Mundial de Cultura Asturiana va desendolcase nel Edificiu Hestóricu de la Universidá d’Uviéu del 4 al 7 de febreru de 2025.
Entamáu pola Academia de la Llingua Asturiana col sofitu de la Universidá d’Uviéu y del Principáu d’Asturies, cuntará nos comités, conferencies y ponencies con investigadores relevantes d’Asturies, España y de más d’una docena de países d’Europa y América. Con un total de más de 60 ponencies.
De gran diversidá de temes que cinquen la bayura asturiana de les ciencies sociales de mou interdisciplinar, dende l’antropoloxía y la etnografía, dende lo rural a lo urbano, a la sociollingüística más actualizaes.
El CMCA25 ye un amuesa de qu’Asturies tien tolos elementos culturales que formen les bases de cualesquier nación del mundiu al traviés d’una rede de símbolos compartíos nel marcu d’una identidá.
Esti Congresu ye un finxu na reconocencia académica internacional de la cultura asturiana. Una puesta al día de la vitalidá cultural material ya inmaterial d’Asturies. Amás de cincar puntualmente la minorización llingüística pola marxinación, persecución o inclusive prohibición en dalgún momentu de la so hestoria. Lo qu’implica la so llimitación de funciones, los ámbitos d’usu, y nun equiparala cola dominante, colo que tien de discursos y actos discriminatorios.
Tamién de la resistencia llingüística del país al desaniciu. Que nun solo implica caltener les llingües propies, sinón empoderar a les comunidaes pa que sientan l’arguyu del so patrimoniu llingüísticu y seyan quien a tresmitilo a les xeneraciones futures nun mundiu globalizáu.
Un fitu rellumante col qu’amosar al mundiu la cultura única d’un llugar nomáu Asturies. Que pue empobinase a inxertase dafechu nos estudios universitarios asturianos. Y d’esta miente, anubrir el güecu nel campu de la educación superior d’esti país con tantu potencial nesi sen.