Costa Rica ye un país pequeñu. Tiene una superficie de 51.100 km2 namái. Como Asturies y Estremadura sumaes. Por embargu caltién más del 25% protexida por parques nacionales y reserves. Lo qu’arreya mediu millón d’especies. El 6% la biodiversidá mundial.
Ye un país ensin exércitu, abolíu por referéndum. Nel que ta prohibíu cazar y los zoolóxicos, la pesca d’arrastre, asina como la minería a cielu abiertu. El 100% de la enerxía llétrica provién de fontes anovables. Poro, nun ye raro que los animales xabaces nun fuxen de la xente, como n’Asturies. Magar tener 1/3 del territoriu protexíu.
Ye’l destín favoritu de los amantes de la natura. De quien quier viaxar pa ver animales, bien seya de lluna de miel o por cualesquier otra sida. Los billetes tán orniaos con animales y una nota de los sos ecosistemes, y non con persones.
La xente respeta y amuesa al turista los animales que ve, mesmo conduciendo un autobús que caminando. Los hoteles tán semaos de plantes con flores pa les distintes especies d’aves de la fastera. Y d’árboles onde escolinguen monos, perezosos, tucanes, y munches otres especies, que puen vese dende les piscines de los mesmos. L’exemplu costarricanu pal mundiu ye’l bon facer na cuestión del mediu ambiente y llograr que la población lo defenda como parte de la so identidá nacional.
Asturies por embargu carez de miles de cazadores llegales o furtivos qu’emburrien animales al desaniciu, de pescadores qu’escosen la vida nos ríos, de quemes xabaces pa xenerar pastu, d’una tradición de “matar bichos” en cuenta de conocelos y protexelos si ye’l casu. La humanización qu’arrodia los espacios protexíos y la cantidá de víes de comunicación que dixebren les árees naturales y fragmenten los ecosistemes, la dala llende al turismu masivu, faen que la teórica proteición llegal nun seya siempres señal del ciñu de la xente pola natura.
Costa Rica ye una esperanza de que’l mundiu tien posibilidaes de camudar la so tendencia autodestructiva, como preba’l cambéu climáticu. Si se quier, puen caltense los espacios que la nuesa especie arrampló a la natura con un grau d’usu sostenible que garantice la so recuperanza. Esa aparente utiopía ye la realidá d’un país nomáu Costa Rica. La república democrática más estable y antigua d’América Central. Pura vida.