David yera un home de pallabra. Los que lu tratemos bien, prestábamos aldericar con él. Yera home de tertulia, conocía’l datu, entendía y atendía al otru y topaba siempre la pallabra precisa; siempre elegante, repunante dacuando, hai una cosa na que tamos toos d’alcuerdu: vamos echalu munchu de menos. Economista y profesor, activista y políticu, intelectual y paisanu; a piques d’entrar nesti iviernu, como quien nun quier la cosa, acabamos perder a ún de los nuestros: ún de los meyores.
David yera de los de nun parar quietu. Aidó fundar el Conceyu d’Asturies en Madrid; y cásique cincuenta años depués, tovía andaba colos compañeros d’aquella mirando y revisando escritos pa ver d’espublizar un llibru más. Siempre comprometíu y coherente, corrió delantre los grises, allá pelos setenta, y d’entós p’acó siguió, col mesmu enfotu, investigando y trabayando pola nuestra cultura más tradicional, poniendo clase, dende la so querida Universidá, pa desplicar, con rigor y procuru, los primeros fundamentos económicos a bien de xeneraciones, y faciendo por llevar a la práctica, cuando nos medios, cuando nes redes y cuando nes organizaciones tolos sos conocimientos, siempre col meyor interés.
David entendía’l compromisu. Y por eso militaba, con enfotu y afición, mesmo nos amigos de la tierra, nel asturianismu políticu, o na ilustración de tolo nuestro. Con too y ser home de palabra, y tertulia, munchu del so llabor yera calláu, rigurosu y paciente: conocía y aprendionos enforma, por dicir, de la tradición más nuestra; y, por dar un exemplu d’apocayá, tenemos munchu qu’agradece-y de la declaración como patrimoniu inmaterial de la nuestra cultura sidrera asturiana. Y de xuru que’l tiempu va enseñanos cómo’l propiu David Rivas Infante forma parte del nuestru patrimoniu colectivu.
David dexa munchu detrás d’él. Y, agora, a nosotros namás toca despedilu como merez. Y albidrar qu’elli mesmu habría tar contentu de sentir la nuestra pena y les nuestres gaites pa ver cómo-y agradecemos que, con tolo fecho, acabó dexándonos un mundu meyor del que conoció. Ente otros, dexa una familia de la que namás tien que tar arguyosu. Dexa tamién una obra —en llibros, escritos, estudios y palabres— que’l tiempu va poner al altor que merez. Y dexa, a la fin, unos amigos y compañeros de viaxe que namás piensen n’esperalu pa volver echar una parolada con él.
David va tar siempre con nosotros y nosotros con elli.
Movimientu 25 de mayu