Estudié Educación Infantil y Educación Primaria nel CP El Cotayo (Carbayín). De los cuatro a los once años fui’l maricón. Depués, estudié Educación Secundaria y Bachilleratu nel IES Río Nora (La Pola Siero), onde siguí siendo’l maricón de los once a los dieciocho. Tovía me sorprende’l poder colectivu d’aldovinación qu’asistió a tolos que m’acosaron pa saber que me diben gustar los homes doce años enantes de que yo mesmu lo supiere.
La universidá foi (casi) un oasis de paz no que se refier al cuestionamientu de la mio orientación sexual. Cuando nos convierten en víctimes durante munchu tiempu terminamos por consolanos con que nos agredan poco.
El pasu de los años y la incorporación a los centros educativos d’Educación Secundaria como docente llegó con grandes dosis d’homofobia per parte del alumnáu: «marica», «maricón», «maricona», «bujarra», «nenaza», «barbie», «culos a la paré»… A los treinta y tres años recién cumplíos acumulo casi ocho años d’esperiencia en seis centros diferentes y solo nún d’ellos me llibré d’estos comentarios.
En dalgunos d’estos centros dixi que yera gai cuando l’alumnáu me preguntó. Recuerdo pensar que yera l’únicu homosexual del mundu munchos años. Cuando supi qu’esistía más xente como yo, empezaron a curar les feríes, entamó a desapaecer el mieu y a entrar n’escena l’autoaceptación; poro, si bien nun falo de la mio orientación sexual de primeres, sí la doi a conocer cuando me pregunten o cuando tengo que facer referencia a la mio pareya. Ye ehí onde’l profesor se vuelve activista y decide que pue ser un referente pal alumnáu col solu fechu d’esistir.
Neses me vi cuando’l 8 de payares de 2021 salí del armariu nel IES César Rodríguez (Grau) delantre d’una alumna de 1u d’ESO tres dicir ella que «a los gais había que matalos a toos». Nun yera la primer vez que la sentía facer comentarios asemeyaos dende lloñe. Nesi momentu di la vuelta y díxi-y col tonu más tranquilu que pudi: «pues vas tener qu’empezar por mí». L’alumna encoyóse na siella al borde del llantu mientres pidía perdón repetidamente. A partir d’esi día too fueron cuchicheos nos pasillos y nel patiu de la que pasaba. Sumáronse les rises y los esparabanes de los chavales que corríen a poner el culu contra la paré. Quien sufrimos esti tipu d’agresiones tamos cansaes y cansaos de que nos nieguen la homofobia d’esti tipu d’actos o hasta de que nos nieguen el tener actuao como acabo de describir: el gaslighting ta a la orde del día.
Bien pensé que diba terminar too al poco, pero nun fizo más qu’agravase. El xueves 11 de payares salí del institutu y sentí cómo dellos guah.es llevantaben escesivamente la voz pa facese notar. Picábense unos a otros y señalábenme mientres se ríen y diben faciendo comentarios a voces cada vez más graves: «Estoy en contra de los LGTB», «no puedo con los gais», «qué asco me dan los gais», «qué asco me dan los maricones», «tenían que matarlos a todos», «había que quemarlos a todos», «putos maricones de mierda, qué asco me dan».
Al día siguiente púnxi-yos un apercibimientu a caún, lo que’l director y la xefa d’estudios quisieron solucionar dándo-yos una charla o poniéndo-yos un videu educativu un día a séptima hora por nun considerar la espulsión una midida pedagóxica. Tresmití la mio disconformidá.
Dende dirección pidiéronme que llamare a les families pa comunicar l’incidente, que ficiere un informe, que pasare a ordenador los apercibimientos porque «así escrito tan junto quedaba muy cutre». El director, depués de pasar un bon cachu riéndose nel so despachu con ún de los alumnos, trató de convenceme de que la versión correcta yera la del chaval, qu’aseguraba tener llamao «maricón» al primu, a lo que yo me sintiere aludíu. Tamién intentó que me sentare con él a falar les coses, mandóme a tres de los cinco alumnos a clase a pidime perdón por un fechu que negaben y trató de diasuadime nel mio empeñu de que fueren sancionaos cola espulsión como recoyía la normativa nestos casos argumentando que podía complicase too si l’asuntu «llegaba a Uviéu» o si les families se negaben a firmar el documentu d’espulsión.
Tres muncho insistir, el vienres 19 de payares la xefa d’estudios comunicó a tol claustru qu’ún de los cinco alumnos quedaba espulsáu trés díes. Non conforme, volví reunime col director, que m’animó a falar col inspector por nun poder facer él más nada.
Nunca me trató nadie tan mal. L’inspector pasó los dieciséis minutos que duró la llamada gritándome mientres negaba conocer l’agresión de cuatro de los cinco alumnos, poniendo en dulda la mio pallabra, asegurando que la mio versión de los fechos quedaba refutada coles declaraciones de los cinco alumnos (descubriendo asina que sí sabía de toos ellos). Llegó a dicime: «¿Cómo me podría fiar yo de lo que dices si no hay constancia en ninguna parte?». Al responde-y que mandara los informes pel corréu institucional, contestó que «eso no tenía ninguna validez».
Depués de colgar fui a CCOO, onde me desaconseyaron denunciar y dir a la prensa. Afirmóse no mesmo l’abogada del sindicatu cuando m’atendió delles selmanes depués. Non conforme, púnxime en contactu con XEGA, mandé-yos un rellatu pormenorizáu de los sucesos y dende l’asociación unviáron-y el testu a la directora xeneral de Xuventú, Diversidá Sexual y Política LGTBI del Principáu d’Asturies. Tres la so dimisión, pasó l’asuntu a manes del so sucesor, quien-y mandó a l’escritu a l’actual Conseyera d’Educación. Esta quedó en pidi-y al serviciu d’inspección que revisare’l casu. Evidentemente, el serviciu d’inspección determinó que la propia inspección actuare de forma correcta.
Esti cursu doi clase nún de los centros nos que l’inspector foi docente va años y siento falar maraviyes d’él. La prudencia nun me dexó cuntar esta historia nel institutu, pero l’ansiedá recurrente que m’ataca cuando siento’l so nome a cada vuelta, fai qu’escriba güei estes llinies cola intención de facer pública l’agresión homófoba que sufrí a manes de cinco alumnos, tapaos toos ellos poles families, l’equipu directivu, l’inspector y l’actual Conseyera d’Educación. Soi una persona adulta, querida y apreciada nel trabayu, pero pa quien menciono equí enriba nun soi otro que’l mesmu maricón de va ventinueve años.