Nes Olimpiaes de Paris de 2024, España presentó per primer vegada más atletes muyeres qu’homes. Lo mesmo ficieron otros estaos de la XE: Portugal, Suecia, Finlandia, Dinamarca, Polonia, Croacia, Rumanía y Bulgaria. Y otros de la Europa Occidental: Reinu Xuníu ya Islandia.
Na delegación española hebo 192 muyeres y 190 homes.
Llevó tiempo, pero a la fin pesllóse la fienda social que se caltenía dende la participación de les dos primeres muyeres nes Olimpiaes de París en 1924.
Mientres que les muyeres participaron por primer vegada nes Olimpiaes de París de 1900 nes que solo yeren el 2,2% del total.
Na Segunda República, en 1931, xorreció la participación femenina nel deporte, entrando na modernidá col votu femenín incluyíu. Per una década. Dempués vieno’l llargu retrocesu de la cabera dictadura.
La práutica regular d’actividaes físiques deportives xenera meyores físiques, síquiques, afeutives, y sociales. La llucha pola igualdá nesti campu foi llarga y va poco que se tien llograo la igualdá teórica na práutica deportiva.
Estos foron los Xuegos Olímpicos de la paridá global d’atletes de dambos xéneros. D’esta miente, participaron 10.500 deportistes, 5.250 homes y 5.250 muyeres. El mayor eventu deportivu mundial nel que muyeres de tol mundiu vieron reflexáu’l desaniciu de vieyos tópicos, prexuicios y estereotipos qu’enantes discriminaben a les muyeres énte los privilexos hestóricos de los homes.
La profesionalización del deporte femenín y la so presencia nos medios de comunicación tienen entá un percorríu por facer, pesia los munchos llogros algamaos nesti sieglu XXI. Sobremanera p’aportar a la igualdá real nel deporte popular.