Diecisiete diputaos de la Xunta Xeneral del Principáu d'Asturies, de los Grupos Parlamentarios de PSOE, IX y Mistu (nesti casu, Covadonga Tomé), presentaron una propuesta de cambéu del Estatutu d'Autonomía para promover la oficialidá de la llingua asturiana y, nel so ámbitu territorial, el eonaviego (adoptando esta denominación, que nun ye del tou pacífica, para'l gallego-asturianu). La propuesta ye cenciella na so redacción y xustifícase, na so esposición de motivos, tantu nel mandatu de protección de la Carta Europea de les Llingües Rexonales Minoritaries (tratáu internacional del ámbitu del Conseyu d'Europa ratificáu per España en 2001) como na previsión de la Constitución, que contempla la oficialidá de les llingües d'España nes sos respectives Comunidaes Autónomes. Sigue lo que'l colectivu Iniciativa pol Asturianu vieno denominando'l «camín constitucional para'l futuru de la llingua».
La propuesta recueye una reforma del artículu 4 del Estatutu con un esquema elemental de declaración de la oficialidá, pareyu al d'otros estatutos, a la que siguiría un desenvolvimientu llexislativu que dotara de conteníu a tal declaración. Pero, coles mesmes, recueye una serie de procuros que nun son menores. Primero, plantega que la garantía del derechu a conocer y usar dambes llingües (que ye la piedra angular de la oficialidá y trai el so usu como llingua normal d'usu polos poderes públicos, xuntu al castellán), fadríase «atendiendo a la realidá sociollingüística del asturianu y del eonaviego». Esa previsión da pie al despliegue progresivu de recursos, a la gradualidad y a la considerancia, nel desenvolvimientu lexislativu, de la condición minorizada de la llingua, de la que pretende la proteición y promoción, pero non la imponsición. La reforma prosigue señalando que'l cometíu de la llei que desenvolvería esti preceptu estatutariu ye «establecer los términos y ámbitos d'usu», lo qu'abonda na llínea de modular razonablemente per aciu de la llei los efectos de la oficialidá. Fadría posible, por casu, evitar la esixencia obligatoria del aprendizaxe en toles etapes educatives o amenorgar la so condición de requisitu nel empléu públicu namái para los servicios qu'específicamente vaigan dirixíos a asegurar l'atención en llingua asturiana a quien la use, y non al conxuntu de los emplegaos públicos (anque pueda ser un méritu valorable en procesos selectivos). La propuesta inclúi una cláusula de salvaguarda, presente tamién n'otros estatutos, proscribiendo la discriminación «en función de la llingua que llibremente s’escueya para comunicase», reforzando'l calter de la oficialidá como garantía de derechos llingüísticos para tolos ciudadanos y constriñendo l'ámbitu sustancial de les obligaciones a los poderes públicos.
Para esti pasu decisivu, cúntase amás, y per primer vegada, con una prospección a xeitu sobro el despliegue de la oficialidá, contenida nel «Estudiu sobro'l marcu afayadizu pa la planificación y desenvolvimientu de la normalización del usu de la llingua asturiana y el gallego-asturianu nel ámbitu del Principáu d'Asturies», coordináu pol Catedráticu de Derechu Constitucional de la Universidá d'Uviéu, Miguel Presno Llinera (2020). Esti trabayu recueye propuestes concretes de regulación nes Alministraciones públiques, nel ámbitu educativu y nos medios de comunicación, analizando los distintos modelos, les esperiencies d'otros territorios, el bagaxe de les polítiques de promoción y usu siguíes hasta agora pola Comunidá Autónoma y les distintes alternatives, incluyida la estimación del impactu económicu, amás d’un catálogu d'ochenta conclusiones y propuestes. No que concierne al costu, qu'hai qu'analizar siempres considerando la posibilidá de llograr recursos financieros adicionales derivaos de la declaración d'oficialidá, l'informe contempla distintos escenarios en función de la intensidá del despliegue de les midíes de política llingüística. Y recuéyese un escenariu «planiáu» como base, con un costu de 21 millones d'euros per añu, que supon una medría d'unos 7 millones aprosimao sobro'l costu actual de les polítiques de promoción y usu. Ye una previsión que, poro, alloña'l riesgu d’escesu del gastu y afita la viabilidá de la implantación progresiva de les midíes de la oficialidá.
La propuesta de reforma parte de la prudencia y ye acorde a munchos de los procuros que, na configuración d'un modelu propiu de política llingüística para Asturies, quixéronse establecer p'afaese a la nuesa realidá sociollingüística. La propuesta puede pasar el filtru de la toma en considerancia nel Plenu de la JGPA, lo que, a lo menos, daría llugar a un análisis a xeitu nel trámite parllamentariu, cola correspondiente ponencia de reforma estatutaria, y eso yá ye un pasu relevante. Pero para l'ésitu de la reforma ye precisu’l sofitu de 3/5 de la Cámara na votación final y que nes Cortes Xenerales tramítese y apruébese dempués como Llei Orgánica. Ampliar los sofitos ye, poro, condición necesaria para que la reforma estatutaria remate con ésitu.
Toca, por ello, un exerciciu de diálogu políticu y negociación al que los proponentes y el restu de fuerces polítiques (PP y Foro) que comparten el deséu de protexer la llingua asturiana tendríen d'allegar ensin apriorismos y con vocación d'alcuerdu. Les declaraciones previes sobro la materia son poco esperanzadores, dende llueu, pero ye'l momentu de demostrar flexibilidá y apostar pol calter útil de la política. PP y Foru podríen por casu, plantegar procuros adicionales nel Estatutu, como l'establecimientu de mayoríes cualificaes na llexislación de desenvolvimientu o remarcar el calter progresivo y suxeto a les necesidaes presupuestaries de les midíes que porte la declaración de la oficialidá. Y, nel planu políticu, adicionalmente al discutiniu sobro los términos de la reforma, podríen llevar l'alderique sobro la llingua asturiana a términos consensuales, lloñe de la confrontación política y compartiendo el protagonismu na consecución d'un marcu xurídicu afayadizu pa la protección de los derechos llingüísticos y la preservación de la llingua asturiana. Nel casu del PP, el saltu cualitativu que daría na so capacidá representativa de la pluralidá d'Asturies sería notable, reforzando un papel centráu, amparando a los falantes (el mesmu Presidente del PP, como tantos ciudadanos del noroccidente asturianu, ye falante arguyosu del eonaviego o gallego-asturianu). Remarcaría la so independencia de criteriu na configuración d'un modelu llingüísticu basáu en conxugar la protección de derechos llingüísticos y evitar los riesgos de la inmersión llingüística (riesgu baxo, en tou casu), incorporando la marca lliberal na protección de la llibertá d'elección de tolos ciudadanos, lo que, naturalmente, inclúi a los falantes de les llingües propies d'Asturies. Nel casu de Foro, sería una amuesa de la so capacidá de consecución d'alcuerdos útiles y reforzaría la so faceta rexonalista, recuperando aliendu nesi espaciu. El centru-derecha, en llugar d'asitiase nuna negativa defensiva ya irracional (o peor, enfotase nel discursu de negación del fechu lingüistico rexonal que sigue Vox) superaría una estorbisa na so vocación de partíu de gobiernu. Como resultáu, superaríamos un problema endémicu d'Asturies, cuayando un alcuerdu amplio y granible nel que la política llingüística nun fuera motivu de choque ente les fuerces estructurantes de la gobernabilidad autonómica.
Puede, sicasí, que repitamos un intentu fallíu, onde persistan postures que, por irreductibles, resulten dañibles, xenerando frustración y desaliendu. Allargaríase'l perenne pleitu de la llingua asturiana, esperando que, al igual del pleitu de les toliñes (como nos recordaba Ánxel Nava na instalación «La voz de la nortiada»), dalgún día una comisión obre'l milagru de poner a los cetáceos en fuga.