L’entamu d’un cursu escolar siempres ye motivu de novedaes y promeses qu’enllenen les cabeceres a lo llargo’l mes de setiembre. Ente les d’esti añu, y convertía yá en Decretu de Gobiernu, hai una que merez un análisis posáu. De lo que tamos falando nun ye otro que la decisión de la Conseyería d’Educación d’aprobar la unificación de los precios por usu del comedor en centros d’enseñu públicos. La cuantía: 4,5 euros.
Equí ye menester facer una pequeña pausa primero de siguir porque lo que pue paecer una decisión acertada pa una Conseyería, tómase gracies a la perseverancia d’un grupu de families de dellos colexos públicos qu’alzaron la voz y se movilizaron p’aparar una inxusticia nos sos comedores y, de pasu, enseñar les debilidaes y carencies del actual modelu (esternalizáu, concursu mediante, a empreses de cáterin en munchísimos de los centros). Poro, nun ta de más repartir el méritu que nos trai hasta la situación actual a les distintes partes.
Unificar la tasa, ta bien. Y ye una decisión acertada porque evita qu’escueles d’un conceyu o d’un barriu tengan precios diferentes a les d’otros, cuando dependen de la mesma institución. «4,5 euros pa toos» (la cifra, claro, podría sometese tamién a un debate). Pero, ¿resuélvense les debilidaes del modelu actual namás con ello? Ehí ye onde precisamente fai falta aldericar.
Poro, en cuenta de falar namás d’equiparar los costos, ye necesario meter nel debate la variable d’unificar (tamién) «la calidá del serviciu». Reflexonemos sobre delles cuestiones: ¿«4,5 euros pa toos» va suponer qu’en tolos comedores el serviciu va ser de la mesma calidá? Afinemos la entruga: ¿«4,5 euros pa toos» va significar que los colexos d’Avilés, Llanes, Uviéu, Llangréu y Cangas del Narcea van tener un serviciu de comedor onde nun se van dar malpenes diferiencies na calidá de los ingredientes, nel procesu de cocináu, na formación de los profesionles al mandu, na ellaboración de los menús, na idoneidá de la instalación y nel protocolu a siguir? O, por contra, y al marxe d’esi «4,5 euros pa toos» ¿van continuar los comedores con diferentes modelos (y por qué non dicilo, «calidaes») en función de la escuela que sea?
Nesi sen, ye importante nun escaecer delles realidaes: les families, por norma xeneral, nun dexen a los fíos y fíes nel comedor por gustu, si non por necesidá de conciliar. Les families, por norma xeneral, nun deleguen una de les comides principales del día por gustu, si non por necesidá de conciliar. Y, les families, dientro d’esa necesidá, por norma xeneral, quieren tanta o más calidá nel modelu que la que se-yos intenta dar en casa. Anque, de xuru que na mayoría de los casos, tamién, con que’l modelu se paeciere a la teoría nutricional qu’apaez nos llibros de testu y que tantes veces se-yos esplica nel currículum de primaria y secundaria, sedría bastante.
Con esto, ye cierto, hai comedores públicos nos que se fai mui bien. Hai otros onde se fai namás bien. Y n’otros, tamién ye cierto, pue ameyorase. Por exemplu, ¿por qué nun tienen derechu tolos escolinos, independientemente del colexu al que vayan, a comer comida cocinao por personal que trabaya nel centru? ¿Por qué unos comen menús fechos en cocina propio y otros, en cambiu, tienen el serviciu esternalizáu a empreses de cáterin? ¿Hai la mesma calidá? Cualquier llector d’estes llínies, ¿ónde escoyería que comiere una fía, un fíu o unos nietos? ¿Nun comedor con cocina y personal propio o nun comedor con serviciu de cáterin?
Fai falta da-y una vuelta a esta cuestión porque la nutrición va muncho más allá de sentase a comer, sobre manera na época escolar, que ye’l momentu nel que s’afiten les bases y nel que se y pue dar un calter, amás de conciliador, educativu (onde se deprende a comer de forma sano).
El modelu actual tien munchu marxe d’ameyoramientu y, igual qu’agora se ta encadarmando un modelu públicu d’escuelines de 0 a 3 (que ye una apuesta acertada y de xuru inspiradora pa munchos otros sitios del mundu), l’alimentación de los menores nos comedores escolares habría ser, pa un «gobiernu d’unidá progresista y con vocación reformista», tamién, oxetu y prioridá de reforma. Facer d’Asturies un llugar onde heba una rede y un modelu de comedores escolares cola mesma calidá pa tolos escolinos, puntera, inspiradora y, por supuestu, pública.
Unificáu el preciu y pensando yá en qué novedaes se van dar pal cursu viniente, igual el siguiente pasu a dar, con convicción, ye’l d’unificar la calidá del serviciu per tol territoriu.
Aspirar a que’l modelu s’ameyore nun pue ser daqué utópico. Fai falta un poco más de voluntá y entamar a poner los pegoyos a un proyectu que diba ser ideal pa esta Asturies que tantes veces se repite que ta inmersa na década del cambiu. Y que nesi cambiu entrare tamién esta cuestión, diba ser mui bona cosa. Y diba ser otru gran aciertu.