La cultura castreña de finales de la Edá del Bronce y de la Edá del Fierro ye xeneralmente desconocida pa los habitantes d’Asturies.
El problema surde dende l’aniciu: l’accesu a esti períodu cultural nun ye fácil. Iniciatives de visites guiaes propuestes por conceyos, visitar castros, centros d’información, webs, llibros, revistes o asociaciones culturales céltiques, son les poques víes esistentes pa triar per esti camín.
El mileniu previu a la nuesa dómina endólcase nun gran misteriu.
El Muséu Arqueolóxicu d’Asturies ye una fonte d’información pela qu’entamar la conocencia d’esa era clave entamada na época prerromana y a vegaes d’allargamientu temporal posterior.
L'espoxigue del potencial arqueolóxicu del país y poro, cultural y turísticu ye un camín que yá percuerre con ésitu Galicia va décades.
Pasa lo mesmo que cola llingua patrimonial. Ellí ye oficial, poro espoxiga. Equí, nun ye oficial, poro inclusive les gallegues de Tanxugueiras pidieron la oficialidá del asturianu nel conciertu d’inauguración del recuperáu Feltival Arcu Atlánticu na Plaza Mayor de Xixón.
D’esta miente, si nun s’escava, nin se faen percorríos, nin se señalen los castros, nin hai educación sobre la tema, nun hai conocencia, nin divulgación, nin valoración d’esta faza singular del nuesu patrimoniu cultural.
Asturies tien una memoria minera ya industrial, pero una desmemoria de la so dómina céltica, sacante los ecos de los festivales de música folk.
Conocer la cultura castreña ye una interesante aventura cultural na que s’adientra una minoría, acaldía mayor, gracies al interés xorreciente ente la población polos raigaños y la identidá llingüística como símbolu d’un pueblu antiguu que se resiste a desapaecer.