La participación al traviés de los distritos n'Uviéu vive nel Antroxu permanente
OPINIÓN
Tal cual, enmazcarao como si fuere dalgo bono, participativo y granible daveres, la conceyalía de participación uvieína encomienda a les asociaciones vecinales aconceyar pa decidir en qué barriu de cada distritu tien de caltener l’ayuntamientu les ceres, papeleres, allumáu y demás equipamientu. Estes xeres, amás de ser de cumplimientu obligáu per parte del consistoriu, tán contrataes de mano coles correspondientes empreses de caltenimientu. Mentato, un añu más, les cuestiones estructurales queden pa prau y nos barrios periféricos siguimos como nos traxeron al mundu, cola equipación de serie: unos parques pa la reciella esfechos del too, dalgún banquín al sol y poco más.
Tampoco nun hai ufierta de vagar, cultura o deporte pa la mocedá, forciao a axuntase, nel meyor de los casos, pa facer botellón, dir mercar al bazar o comer una pizza en dalgún de los llocales de franquicia que principien a ocupar tamién les nuestres barriaes. Por eso manquen tanto dellos casos, como’l de la esplaNada nel barriu La Florida: un millón d’euros marafundiáu en cuenta de financiar con esi dineru otros proyectos, cuntando cola participación real de la vecindá. Pero nada, quieren más xuntase coles asociaciones 45 minutos una vez cada tres meses (si cuadra) pa pidinos que nos pongamos d’alcuerdu pa escoyer ente toes les tres úniques intervenciones que van incluyir pa tol distritu nel presupuestu del añu viniente.
Pa rematar, ponen como exemplu d’actuaciones a escoyer una riestra de cuestiones qu’habríen facer d’oficiu, como l’arreglu de ceres, pavimentación o instalar más papeleres. Con ello vamos perder una oportunidá más: llevaremos les peticiones recoyíes ente la vecindá, pasarán pelos técnicos de la casa conceyu y, atechándose nellos, dende l’equipu de gobiernu municipal refugarán otra vez les nuestres solicitúes. Pero claro, los conceyos coles asociaciones nos distritos nun cifren, queden escluyíos de les remuneraciones por comisión de trabayu en conceptu de dietes, y los representantes municipales nun van fadiar la tardiquina de cualquier día de la selmana p’aguantar a les vecines y vecinos. Pa más aquel, diben facelo de baldre. Entós dexaránlo pal añu qu’entra, cuando vuelvan a convocanos al altu la lleva; too mui participativo y democrático.
Entrín y non, nos nuestros barrios la reciella va siguir xugando en parques esfechos, la mocedá faciendo botellón, mercando nel bazar o comiendo una pizza de franquicia y los vieyos sentaos nun banquín al sol. Eso sí, nun banquín monocolor porque sabemos qu’al nuestru alcalde lo colorío y antroxero namái-y presta cuando se trata d’enmazcarar el so despotismu.