Llibertá, esa ye la clave: llibertá pa mandase del asturianu, el que quiera, sepia y seya quien. La oficialidá nun ye otro qu’eso: consentir la validez d'un idioma pa ser a usalu n'instancies oficiales. Puntu. Querer, saber y poder. Ensin imposiciones, ensin prohibiciones, ensin obligaciones.
La nuestra Constitución dizlo claramente; tenemos la obligación de facer oficial esi patrimoniu que guardamos: «Las demás lenguas españolas serán también oficiales en las respectivas Comunidades Autónomas de acuerdo con sus estatutos…» (art. 3.2). Y, por contra, el nuestru Estatutu nun sigue esi mandáu. ¿Cómo ye eso posible? ¿Quién somos pa nun facer casu? ¿Cómo s’atreven los nuestros políticos a incumplir la Carta Magna? ¿Qué nos ta pasando?
Pues, básicamente, que caimos en cuatru falsedaes. Y vamos esbillales. La primera, que l’asturianu —como idioma— nun existe. Ya saben; muertu’l perru acabóse la rabia, y con eso anduvimos enredaos bien d’años: que si el bable yera un dialectu, que si nun taba unificáu, que si namás valía pa en casa, que si siguía ensin maurecer, y nun sé cuantes tonteríes totalmente acientífiques que lo único que consiguieren foi que perdiéremos una montonera tiempu.
La segunda trampa pa incumplir la llei foi la manipulación interpretativa: la Constitución mándase del terminu «serán» —que, en castellanu, ye inequívocu— y eso dalgunos consideráronlo una posibilidá en cuenta una obligación. Una conclusión tan surrealista como, por dicir, entender l’artículu 46 de la mesma Constitución —«La ley penal sancionará los atentados contra el patrimonio»— y nun los sancionar; o dexar l’artículu 35.2 —«La ley regulará un estatuto de los trabajadores»— ensin una llei que lo regule; o, por dicir, desobedecer l’artículu 64.1 —«Los actos del Rey serán refrendados por el Presidente del Gobierno»—dexando que’l Presidente del Gobiernu nun los refrende.
L’engañu númberu tres de los nuestros llexisladores foi buscar un atayu: aprobamos una llei autonómica y con eso vamos tirando. Y non, nun val. Y a poco que lo intentemos, aparecen los pilancos: ensin oficialidá nun se pue usar llibremente l’asturianu nel parlamentu, na Universidá, nes notaríes, nos plenos municipales… y asina hasta l’infinitu porque los únicos que nun tienen problema pa usalu son los que nun lo fain.
Y mientres y non, seguimos enguedeyaos na trampa númberu cuatro, que nun ye otra que la colisión de derechos. Pa los negacionistes, enfrente’l derechu a expresase n’asturianu existe otru derechu —d’igual altor— a nun consentilo, a nun oyilo, a nun tener nin que sentilo. Y non. En derechu, la cosa nun furula asina: nun existe nengún derechu constitucional a que naide use l’asturianu enfrente tuyo; nun se contempla nenyuri’l derechu a nun escolarizase, a nun tener que camudar el canal de televisión, o a nun sentir unes palabres que nun te gusten, cuentes que son aldeanes o nun quies entender.
A lo último, trátase de cumplir la llei. Namás. Y la llei cimera, la llei de lleis, la nuestra Constitución (sacante los trataos internacionales) ye inequívoca n’esto: la llingua asturiana ha ser oficial. Puntu.
Cuarenta años después del nuestru Estatutu, la derecha asturiana tien una oportunidá de facer les coses bien, a xeitu, a mou; y non por obligación, nin por cálculos electorales, nin por imposiciones parlamentaries. Algamar la mayoría de tres quintos —l’apautada pa modificar l’Estatutu— por un votu namás ye lexítimo; pero nun ye buena idea: ye vencer, pero nun ye convencer. Y lo que necesitamos los asturianos d’equí pa en delantre ye más xuntura, más consensu, creénoslo más, y convencenos que nun somos menos que naide. Porque namás faciendo eso vamos poder atopar, a comuña, un camín más prósperu pa esta tierra tan castigada.
El Reinu d’España tien más de cuarenta y seis millones d’habitantes honestos y lleales; de los que venti d’ente ellos viven en comunidaes autónomes con dos llingües oficiales. Comunidaes prósperes y abiertes, como la nuestra vecina Galicia, gobernaes darréu pol Partíu Popular. ¿Van dicime los representantes de la derecha asturiana que tan toos ellos enquivocaos y empeñaos n’imponer a los sos ciudadanos unes obligaciones inconstitucionales? ¿O somos nosotros los que vamos a contracorriente? ¿Qué Estatutu, el gallegu o l’asturianu, cuadra meyor col espíritu y la lletra del artículo 3.2 de la Constitución española?
La nuestra derecha tien qu’atopar, asumir y proponer un modelu propiu de normalización. Valió ya de tópicos inconsistentes y de discursos negativos. Ya nun se trata d’enseñar les carencies del contrariu y —n’eso tienen razón— de que’l contrariu enseñe les nuestres. Trátase d’atopar, xuntos y a gustu, modelos d’alcuentru. Y nun podemos perder más tiempu. Tenemos una oportunidá histórica d’iguar un incumplimientu inconstitucional. Y esti ye’l momentu.
Y si queremos, somos quien; en positivu: oficialidá sí, obligatoriedá non.