Anatomía d'unes navidaes
OPINIÓN
Nel conceyu d’Uviéu, o a lo menos na capital, pasa cola Navidá como colos turrones nes grandes cadenes de supermercaos: cada vez llega más llueu y con más bayura d’opciones pa consumir.
El 26 de payares yá anunciaba la prensa que l’ayuntamientu uvieín diba disponer 20 máquines de ñeve artificial (16.456 €) pa la inauguración de les lluces navidiegues del viernes 1 d’avientu. Pero Alfredo Canteli declaraba que tenía un fin bien noble: convertir l’eventu en «referente» nel norte del estáu y potenciar la economía llocal. La verdá ye qu’últimamente cuesta sentir al alcalde falar de propósitos que nun tengan que ver col espoxigue del comerciu y la hostelería llocales, da igual que’l tema seyan los presupuestos, les fiestes, l’urbanismu… Les tiendes y les terraces tán siempre na tiesta y na boca d’esti home.
Depués del gloriosu día qu’axuntó a bien d’uvieínes y uvieínos nes cais y a montoneres de coches nes víes conxestionaes, Canteli taba eufóricu. Nun yera pa menos, porque lo frío y húmedo del primer día del mes d’avientu nun torgó a la xente d’asistir al prendíu de les lluces (1.300.000 euros, esto ye, 5’87 € por habitante gastaos nelles siendo Uviéu la segunda ciudá del estáu con mayor presupuestu per cápita esti añu, solo detrás de Vigo) amenizáu pol grupu Villaboy Band. La única pena foi que l’efeutu de les máquines de ñeve nun pudo ser l’esperáu porque l’agua que cayó tola tarde convertía la espuma nuna especiu d’aguañeve menos vistosa de lo que se pretendía. Con too y con ello, Canteli amosóse confiáu col despliegue organizáu pol so consistoriu -con especial relevancia de les conceyalíes d’Alfredo García Quintana y Covadonga Díaz Álvarez- declarando al más puru estilu Miguel Gila que «alguien» ficiera’l prendíu la selmana anterior pa nun competir cola cai Uría y los sos 17.980,6 € d’escenariu y equipamientu pa la inauguración sumaos a tolo anterior.
Una de les grandes novedaes d’esti añu foi la presencia xunto col tradicional mercáu d’artesanía, agora asitiáu na Plaza la Catedral, del «Mercado de El Camino» na cai Gil de Jaz. Na yá de por sí comercial cai del centru d’Uviéu colocó l’ayuntamientu 8 casetes (18.149,99 €) pa que 60 monesterios españoles pudieren ufiertar los sos productos. La conceyala d’Economía, Transformación Digital y Políticas Sociales, Leticia González, presentaba a mediaos d’avientu esti mercáu como «pionero en el norte de España» y con un doble propósitu: promocionar el Camín Primitivu y ayudar a caltener l’actividá relixosa de monxos y monxes, nesta ocasión cola collaboración de la Fundación Contemplare, al serviciu de más d’un centenar de conventos de clausura, cuya vocera declaró que «España es la primera potencia mundial en vida contemplativa». Pa too ello hubo que sumar al costu de les casetes l’asistencia téunica (12.100 €) y serviciu de seguridá (6.050 €). Que Dios nos lo pague, porque la inversión nun foi poca.
Otros dos polos importantes de l’actividá navidiega n’Uviéu fueron el cascu vieyu, colos clásicos mercáu d’artesanía y portalín, y l’esitosu -unos díes más qu’otros- tren «turísticu» (13.845,92 €) y el Campu San Francisco. Nesta última ubicación axuntáronse bien d’actividaes pa la reciella y tamién pa los y les mayores, con caballitos, noria, pista xelu, casa de Papá Noel (qu’ente esto y la cabalgata correspondiente requirió en conceutu de «elfos y renos» 14.520 €) y otres 8 casetes hosteleres al estilu del San Mateo d’estos últimos años. Estos recintos paez que nun tuvieron l’asistencia esperada, seique pol fríu de la época. Amás, paez que los precios de les actividaes empobinaes a neños y neñes nun yeren demasiado asequibles.
Pa rematar como entamamos, l’agua tentó d’estropiar tamién la cabalgata de la viéspera del día de Reis. Pero otra vegada más, el consistoriu resistió los ataques meteorolóxicos y nel últimu momentu Covadonga Díaz decidía valientemente que «salimos con todo». La cabalgata tamién batió récor con 1.700 figurantes esti añu y namás tuvo un sustu cola cayida de dos caballos del cortexu del rei Baltasar al resbariar nel suelu moyáu (18.143,95 € costaba l’alquiler de los caballos de tiru pal desfile). Quedaba la ciudá en vilu pola suerte de los animales. ¿Diben quedar les pascues uvieínes manchaes por mor del trespié ecuestre (otru más depués del de la xestión del Asturcón)? Afortunadamente la navidá ye tiempu pa los milagros, aínda más cuando la cai Gil de Jaz ye l’epicentru del monacatu español, y, como nun filme de Frank Capra, la prensa asturiana informaba a los pocos díes que los dos animales, Castañito y Tordito, taben en perfectu estáu de salú y descansando nes sos cuadres del Centru Ecuestre «El Centauro» de Tudela de Duero, en Valladolid. Lo que sigue pelos suelos ye’l presupuestu de cultura del conceyu carbayón, que yá tien en xaque a los exitosos programes de muestra cinematrográfica RADAR y SACO. Les perres nun dan pa too.
En total, casi 40 díes duró la Navidá na capital asturiana. Pa facer balance, amás de la barbaridá de perres en lluces, hai qu’añader los más de 400.000 € de gastu públicu que requirió si consultamos los contratos menores na páxina de Contratación del Estado -a tolo citao nos párrafos anteriores hai que sumar la contratación d’azafates pa mercaos y belenes, la cartelería, la publicidá en medios como La Nueva España (4.242,26 €) y COPE (6.000 €), los vídeos y reportaxes fotográficos, l’animación na cai, el vestuariu y regalinos con partíes curioses como los más de 5.000 € en «gorros de Papá Noel», el montaxe y desmontaxe…-. L´únicu peligru que tien too esto ye’l mesmu que colos turrones: que cuando los garramos con demasiada ansia acabamos refalfiando, empachaos y con sentimientu de culpa. Y la fartura pue ser más grande entá si pensamos que se tán faciendo retayos n’otres estayes de calter social y cultural.