Los tiempos que vivimos siguen siendo daveres estraños, tan estraños que, como dicía Bertold Brecht, ye necesario defender lo obvio. Y lo obvio ye que, como dixo'l xueves pasáu’l Defensor del Pueblu, el señor Gabilondo, nun ye de recibu que la presidenta de la Comunidá de Madrid niegue beques de comedor a families probes mientres da ayudes a rentes altes qu’ingresen más de 100.000 euros al añu. ¿Cuál ye l’argumentu de la presidenta pa defender esti despropósitu? Paez-y que «les rentes medies son les que siempres paguen y enxamás reciben nada». Tamién-y paez discriminatorio que quien escueye un colexu priváu nun tenga los mesmos derechos pa recibir una beca que los colexos de la enseñanza pública. Estos sosprendentes argumentos déxennos ensin palabres, pero tenemos que recuperanos y dicir que, anque la comunidá de Madrid tien la tercera renta más alta d’España (23.338 euros/añu), hai conceyos como Cenicientos, el so nome sienta-y como un guante, que ye’l más probe de Madrid, malpenes llega a los 10.007 euros/añu; lo mesmo podíamos dicir de Parla, Villaconejos y Colmenar de Oreja que nun lleguen a los 11.000 euros/añu.
Hai una palabra muy prestosa n’asturianu, marafundiar, que se refier a gastar munches perres de mala manera. El dineru que tenía que dir a compensar al alumnáu con desigualdaes socioeconómiques que vive en conceyos de renta baxa va, por culpa del caprichu de les polítiques madrilanes, a financiar el Bachilleratu, tamién la FP, en centros privaos a families con ingresos de más de 100.000 euros/añu. Ye un marafundiu dafechu que la Comunidá de Madrid pague 43 millones d’euros a 16.809 estudiantes de families qu’ingresen más de 100.000 euros pa questudien Bachilleratu en centros privaos, incluyíos dalgunos que segreguen per sexu al so alumnáu.
Lo obvio de too esto ye la «falta de equidá» nesti asuntu, que nun conoz asemeyu en toa Europa. Tamién ye obvio que les beques son un mediu pa «ayudar a equilibrar les posibilidaes ente alumnáu con recursos y los que nun disponen d’ellos»y que’l so sentíu ye n’esencia pa situaciones de necesidád social y de dificultaes pa exercer el derechu a la educación. Por esti motivu, Gabilondo píde-y que «revise los criterios de renta establecíos na so normativa reguladora pa la concesión de beques y ayudes al estudiu col enfotu de qu’éstes cumplan la finalidá de compensar al alumnáu con desigualdaes socioeconómiques desfavorables».
Llamentablemente poques persones dulden de que les beques pa rentes altes d’Ayuso, que financien a ún de cada tres estudiantes de Bachillerato en centros privaos, lleguen a modificase, anque-y lo pida el defensor del pueblu, porque les beques «pa ricos» suéna-yos a gloria bendito y nun-y dan más les situaciones de necesidá social y de dificultaes pa exercer el derechu a la educación. El casu ye que Feijóo considera «discutible» dedicar dineru público a beques pa families de rentes altes como fai Ayuso, pero al mesmu tiempu defende l’autonomía de Madrid pa facer lo que-y venga en gana. Vese nesta polémica decisión, na que les persones en riesgu de probreza puen quedar hasta sin beques de comedor mentanto los más ricos son becaos, que Madrid toma les sos propies decisiones. Y el señor Feijóo, que ta baxo’l dominio del «Triángulu de les Bermudes» (Isabel Díaz Ayuso, Miguel Ángel Rodríguez y José María Aznar), nun s’entera de que puen facelu desapaecer del mapa políticu como ficieron col so antecesor el señor Casado.
Nin el Triángulu de les Bermudes, nin el cuartu en discordia, el señor Feijóo, s’ interesen en lleer documentos como Desigualdades socioeconómicas y rendimiento académico en España, nos que dicen que ta demostrao pola evidencia empírica que’l nivel socioeconómicu del alumnu condiciona’l so rendimientu académicu y que pa reducilu hai que caltener les ayudes a los estudiantes con un nivel socioeconómicu más pequeñu. Pero al Partíu Popular nun-y importa compensar desigualdaes d’orixe. Ye más, fáenlo porque saben que si nun hai igualdá n’educación la sociedá nun va ser igualitaria.
Pues eso, que lo obvio pa la presidenta de la Comunidá de Madrid ye que les perres nun son importantes, anque reconocerá, como dicía Groucho Marx, que facilita les coses pa consiguir llograr lo que sí lo ye pal PP: una sociedá cada día más desigual. Porque si financiar con beques a los más ricos nun ye importante, ¿qué ye entós? Pues nestos momentos p’Ayuso ye vengase por nun ser invitada a la inauguración de la variante de Payares; por esti motivu nun va almitir miembros del Gobiernu nos sos actos tres nun ser convidada a la inauguración del AVE a Asturies. Y dizlo ella qu’actúa tan inxustamente nel tema de les beques. Si la meyor venganza «ye ser diferente de quien fizo’l dañu», tenemos qu’oponenos con toles fuerzes a estes inxustes beques, qu’agora namás tán presentes en Madrid.
Ello ye qu’un documentu medieval afayáu por un profesor escocés refuta la lleenda benefactora de Robin Hood, al apuntar qu’él non solo robaba a los ricos. Si’l Partíu Popular llegare al gobiernu d’esti país otra vuelta, visto lo visto, va facer tolo posible pa qu’España seya’l país más desigual d’Europa. Amás, van tratar de convencenos de que los sos dirixentes son muncho meyores qu’aquel arqueru encapucháu y los sos secuaces yá qu’engañen a cara descubierta. Lo obvio nun ye namás que nos mientan, sinón que’l PP camiente que la sociedá española nun merez la verdá.