Les Medayes d’Asturies representen los premios de más altor, entregaos nel Día d’Asturies, a los ciudadanos o entidaes destacaos por facer actividaes beneficioses pal interés xeneral del país.
Esti añu rellumó la Medaya d’oru a Xosé Lluis García Arias.
Foi la reconocencia social a toa una vida d’estudiu y defensa del idioma asturianu. Entamando con Conceyu Bable, siguiendo cola Academia de la Llingua Asturiana (ALLA) y na Universidá d’Uviéu. Arias recoyóla entendida como una reparación hestórica al asturianismu cultural. Arias tiene tres de sigo una vida de trabayu pola dignificación de la llingua asturiana. El mayor bien cultural inmaterial asturianu.
Una xera perllarga como escritor y académicu con finxos notables pa l’ALLA de la que foi’l primer presidente per venti años.
Como afita en LNE Xosé Antón González Riaño, presidente actual de l’ALLA, esta espoxigó con obres como les Normes Ortográfiques, la Gramática de la Llingua Asturiana y el Diccionariu de la Llingua Asturiana. Tamién Arias dexó a la nuesa sociedá el Diccionario General de la Lengua Asturiana, la Gramática Histórica de La Lengua Asturiana, Toponimia Asturiana: El porqué de los nombres de nuestros pueblos, les Propuestes Etimolóxiques, los Estudios Sociollingüísticos de Lleón y Zamora (a comuña con Riaño) y el Diccionariu Etimolóxicu de la Llingua Asturiana (obra que poques llingües tienen).
A ello hai d’axuntar la so defensa de los drechos llingüísticos d’Asturies nuna bayurosa llista d’ocasiones. Inclusive nel so emotivu discursu de recoyida de la Medaya d’Asturies, vindicó la igualdá llegal del asturianu al empar que nes otres comunidaes billingües.
Y espardió’l méritu a tolos que puxaron tantu tiempu pola llingua y sofitancia del país.
Per otru llau, l’anuncia del presidente d’Asturies de concedéi-y la Medaya l’añu que vien a la princesa Leonor de Borbón y Ortiz ye una mena de descreitu haza esti premiu. Paez un xestu impropiu del autogobiernu democráticu de la comunidá autónoma qu’empobina.
¿Qué méritos tien la princesa Leonor pa recibir el gallardón cimeru d’una tierra que namái visita cuando toquen los premios principiegos?
¿Nun ye Leonor una turista privilexada que vien dellos díes al añu, ensin esfuercios conocíos pola tierra que-y da títulu al so cargu aristocráticu, de la que nun conoz nin la so llingua, que nun emplega nin nesos díes?
¿Por qué amás ye una aición que sí fai col catalán cuando-y toca representar el títulu de princesa de Girona… y equí non?