Paez que’l nuesu pasu pela pandemia nun pasó per nós. Que nun deprendimos entá cómo torgar la viniente con un cambéu de comportamientu y unes riegles cencielles.
Miles de finaos y hospitalizaos nel más grave andanciu del sieglu nun foron enforma. La pandemia nun finó, anque les midíes de proteición tán relaxaes. El branu yá aportó equí.
Yá hai fiestes con voladores nes que fuxen les mascotes con medrana. Tornaron les fiestes nes sableres nes que s’enllenaron los espacios de tonelaes de basoria.
Hai mázcaros tiraos, o perdíos, per tolos llaos. Los mázcaros quirúrxicos son de polipropilenu, un plásticu deriváu de combustibles fósiles que tarda unos 400 años en descomponese. Amás, davezu acaben en ríos y mares afeutando a les especies marines. L'incivismu asocede en tol mundiu. Los dueños de perros alvierten que si los garren cola boca, tamién los guantes d'un solu usu, han de retiralos ellos coles manes y poro, col riesgu evidente de contaxu. Lo que nun ye de recibu ye atopase con mázcaros tiraos en cualesquier fastera rural o urbana, como suel pasar. Diz bien pocu del nivel d'educación de la población, qu'agora mesmo mos llevara a la sétima fola del covid-19.
Volvióse al vieyu esquema de la masificación nes actividades públiques y privaes. Cuspe na cai xente de toles edaes. Nin siquier a la Sanidá desbordada que tanto s’aplaudía al entamu. Como ítems de Médicos del Mundiu:
¿Deprendimos a defender l’Atención Primaria?
¿Escuchamos a les persones mayores?
¿Nun dexamos a naide fuera?
¿Respétase más el drechu internacional humanitariu?
Yá se fala de nuevos picos d’incidencia mientres se clama nos medios al turismu pa qu’enllene otra vegada’l país. Nun se fizo por reforciar la cantidá d’espacios verdes urbanos. Too abulta una nueva oportunidá perdida pa meyorar la conciencia social y les sos actitúes. ¿Pa cuándo se quier deprender? ¿Pa la que vien?
Una minoría sigue les pautes que rique la salú de la población. Por embargu, una mayoría nun fai otro que tornar al mesmu desorde d’enantes del andanciu y que quiciabes mos llevó a cadecer les sos consecuencies.
Tampoco nun se vacunó a los países ensin recursos. Polo qu’otres variantes puen biltar nun nuevu ciclu mundial de malures.
¿Por qué nun deprendimos entá?
¿Quiciabes esperando cómo sedrá l’aumentu la incidencia dempués de les vacaciones? Pa siguir llueu coles rutines que creyíemos abandonaes. Pa eso tantes vacunes, distancies, llavaos y mázcaros…
Porque yá que siguimos na pandemia, anque finara'l confinamientu, hai de caltener les midíes de seguridá.
¡Mirái que cayó'l mesmu presidente!