El 16 d'ochobre volvemos a tener una cita cola defensa de la cultura de nueso, cola oficialidá de la llingua. Esi día hai convocada una manifiestación n'Uviéu pa reivindicala y ehí ha tar Comisiones Obreres d'Asturies.
Cuesta trabayu entender a estes altures qu'haya xente que refugue da-y la máxima consideración posible a una llingua vernácula, como ye l'asturianu. Afortunadamente trátase d'una minoría. Cuesta trabayu entender tamién que la mayoría tenga que siguir reivindicando lo que ye nidio, porque falamos d'una llingua na que yá escribía los sos poemes Xosefa de Xovellanos nel sieglu XVIII. Cuesta trabayu entender qu'haya que siguir manifestándose pa esixir lo que nos correspuende. Pero tornaremos a facelo hasta llograr l'oxetivu.
Nel sindicatu siempres lo tuviemos claro. La nuesa organización tienlo recoyío nos sos estatutos de mou esplícitu: «les llingües pal usu de CCOO d'Asturies son l'asturianu y el castellanu. Nel ámbitu territorial del occidente tendráse en cuenta al empar l'usu del gallego-asturianu». Por dicilo de dalgún mou, pal sindicatu la «oficialidá» ye un fechu que yá se da.
Llevámoslo a la práutica col usu cotidianu, por exemplu, na revista «El Sindicato», muérganu de prensa de CCOO d'Asturies. Dende fai décades caltenemos una rellación fonda de collaboración cola Academia de la Llingua Asturiana, institución que va unos meses tornó al asturianu la ponencia sindical pal últimu congresu.
Darréu d'ello, defendemos la so máxima reconocencia nos nuesos documentos congresuales y naguamos por esparder el so usu nel ámbitu educativu y cultural al traviés del nuesu Sindicatu d'Enseñanza, afalando'l so emplegu nes aules y lluchando por enanchar la ufierta optativa n'Infantil o la vuelta a les 4 hores llectives selmanales en Bachilleratu.
Al empar reivindicámoslo tamién pente medies de la movilización, participando de mou activu en toles manifestaciones que se convocaren pa sofitar la llingua asturianu y col llexítimu enfotu por algamar la oficialidá.
La llingua nun pue siguir nun albentestate llegal por más tiempu. L'Estatutu d'Autonomía cumple 40 años y esti aniversariu ye una perbona ocasión pa dar pasos en derechos, na defensa de lo de nós, y finar con una delda histórica cola llingua. Porque si queremos que'l nuesu patrimoniu cultural se caltenga hai que curialu y da-y la máxima consideración: facelu oficial. Vamos cumplir, d'esti mou, col artículu 3.2 de la Constitución qu'afita que «les demás llingües sedrán tamién oficiales... acordies colos sos estatutos». Y hai una mayoría abonda na Xunta Xeneral pa facelo: el candáu nes puertes de la oficialidá ta dafechu frayáu.
Tamos falando del patrimoniu cultural de más valir que tenemos: la nuesa llingua. Un patrimoniu qu'hemos caltener. Nun tendría perdón nun lo facer. Y ye agora cuando tenemos la oportunidá.
*José Manuel Zapico. Secretaría Xeneral de Comisiones Obreres d'Asturies