Estos díes los partíos políticos que representen a los asturianos y les asturianes na Xunta Xeneral tán falando col presidente Barbón pa conocer los sos puntos d’aniciu na negociación pa la reforma del Estatutu d’Autonomía d’Asturies. En poques ocasiones tuvimos n’Asturies la posibilidá d’ameyorar el nuesu testu autonómicu, pues nun hubo interés o nun dieron los votos pa ello cuando dalguién lo plantengó. Ye por tanto una oportunidá hestórica y bien interesante que nun habría dexase escapar.
Asturies carez problemes de tou tipu dende va décades, dalgunos dende va sieglos, naide niega esa realidá, pero gracies a les posibilidaes que mos dio l’autogobiern que tuviemos nestos años (curtiu y probe, pero autogobiernu), pudimos face-yos frente y esplorar soluciones afayaes a les nueses circunstancies.
Formo parte d’una xeneración que vio colar fuera d’Asturies a gran parte de los sos amigos, d’una xeneración que ta viendo peligrar el futuru de les llingües y la cultura d’Asturies, una xeneración que careció paru y precariedá, falta de posibilidaes y d’infraestructures... Munchos son los asuntos por solucionar. Nun sé si sedremos quien a igualos toos o a facelo de forma completa, pero lo que sí tengo claro ye que naide va venir a solucionanos esos problemes. Vamos tener que ser nós como sociedá quien lo faigamos.
El cambiu ha pasar por xestionar los asuntos d’Asturies mirando p’Asturies, con análisis y ferramientes propies. Les infraestructures y los servicios que dependen d’otres alministraciones, que se xestionen a cientos de quilómetros, siguen ensin avanzar, o hasta retrocen na calidá, como asocede col sistema de ferrocarriles n’Asturies, namás un exemplu de munchos. La nuesa capacidá autonómica ye tan curtia que nin siquiera ye posible convocar unes elecciones ensin que toque repitiles nel periodu habitual, anque entá nun pasaren cuatro años, como asocedió tres el gobiernu de 2011.
Cuarenta años fueron abondo pa saber que necesitamos iguar los problemes qu’arrastremos hasta agora, con valentía y responsabilidá. Precisamos más competencies, más capacidá de reacción y d’acción dende les instituciones propies. Mui cerca tenemos exemplos como’l gallegu, onde unes mayores cotes d’autonomía permitieron un desendolcu más positivu de la so sociedá, de la so cultura y de la so economía.
Protexer y da-y una oportunidá de futuru a les llingües d’Asturies, en convivencia col castellán, ye tamién clave pa solucionar el problema d’autoestima y complexu d’inferioridá que tovía vivimos los asturianos al respective de la nuesa cultura. La oficialidá ye la midida qu’acuta pa ello la Constitutición española, y ponenos d’alcuerdu nesta midida va ser tamién una prueba de madurez como sociedá y un elementu que va amosar que somos quien a ponenos d’alcuerdu no elemental, naquello que nos axunta a toos y toes, sacantes a aquellos que vienen a destruyir la democracia y la convivencia con discursos d’odiu.
Agora ye’l momentu de la verdá. Unos y otros han demostrar que son quien a ponese d’alcuerdu nun proyectu autonómicu p’Asturies, que nun supón tar d’alcuerdu nin siquiera nel enfoque de les polítiques, sinón namás en dotanos de ferramientes competenciales pa solucionar equí, con fórmules propies, los problemes y los retos d’esti territoriu. Dempués cada partíu habrá facer les propuestes qu’albidre meyores pa desendolcar eses competencies. Pero yá nunca podemos permitir que la escusa pa nun solucionar los problemes d’Astuires pueda ser que nun tenemos les competencies pa facelo. Enfrentémonos con valentaría y espíritu constructivu a esti procesu de reforma estatutariu, pa que’l resultáu traiga más prosperidá y calidá de vida.