Adolf Hitler resucitáu, el Monstruu de les Galletes y los emporricamientos de la ultraderecha
OPINIÓN
La ultraderecha lleva un tiempu siendo protagonista de la prensa. N’España dellos militares xubilaos escribieron una carta pidiendo la unidá y revindicando la democracia de Franco. Nun chat de WhatsApp los ultres proponen «fusilar a 26 millones de fíos de puta». ¿Sentiránse avergonzaos por estes pallabres malsonantes? Camiento que retirarán lo de «fíos de puta» pa nun ofender y puntu. ¿Cuál sedrá’l so verdaderu propósitu: fusilar a lo lloco o presentase al concursu del disparate más orixinal del nuevu añu? El problema ye que son conscientes de que cumplir con esi retu tan descomanáu va ser perdifícil, anque mucha xente cree que lo de dexar de fumar o adelgazar entá pue ser más inalcanzable.
Los ultres nun tienen dulda de que «les maniobres del 36 proporcionaron unos cuantos años de progresu», gracies al Irrepetible; ye dicir, a Franco. Eso sí, reconocen que na dictadura dalguna xente lo pasó mal, pero paez-yos que’l trabayu de fusilar a la xente y dexalo tirao per ende fueron caxigalines dafechu comparaes cola paz y prosperidá que traxeron pal pueblu español. Y como son «solidarios» y trabayadores tán dispuestos a facelo gratis a pesar del tiempu que-yos supondrá acabar cola «mala» estirpe española. Saben que nun cuntarán con muncha ayuda porque hai un virus que ta afeutando al cerebru de los ultres y vuélvelos cobardes y sensatos cuando en realidá son tolo contrario.
El casu ye que s’escaecieron del chat y de la carta cuando salió na prensa qu’Adolf Hitler resucitare y ganare unes elecciones en Namibia. Blincaben d’allegría porque taben convencíos de qu’enxamás votaríen más. Eso sí, a los ultres alemanes nun-yos fizo gracia que’l so almiraú líder fuese presidente en Namibia y non n’Alemaña. De toles formes, camentaron que yera un detalle menor. Abúltame qu’al principiu a los ultres españoles debió molesta-yos que’l primeru que resucitare fuere’l Führer y non Franco. ¿Cómo’l dictador alemán nun foi más consideráu y dexó que’l xeneralísimu resucitare’l primeru depués del trauma que-y supunxo que la izquierda lu sacare de males maneres del Valle de los Caídos? Fuere como fuere, los ultres españoles allegráronse porque Hitler tamién ye un iconu pa ellos y confiaben que darréu va tocar el turnu al so xeneralísimu. Camiento que nun tarán dispuestos a dexar que’l Irrepetible pise África, un país de probes llamaos a emigrar a España.
¡Qué menos que’l Führer venga pa España! Y si nun quixere, siempre-yos quedará Andaya pa falar de les barrabasaes feches nel pasáu. El casu ye que cuando taben a puntu de tirar voladores porque diben captar millones d’adeptos y a la fin llograr l’orixinal propósitu del añu nuevu al cuntar cola estimable ayuda d’Hitler y Franco, qu’en fusilamientos yeren célebres, el so gociu cayó nun pozu: el políticu Adolf Hitler que ganare les elecciones en Namibia namás yera un impostor. El so apellíu, Uunona, nun ye mui ariu que digamos, tampoco la so piel y los güeyos, más escuros que’l carbón. En tou esti asuntu hai enigmes ensin descifrar: ¿Cómo so pá-y punxo esi nome ensin enterase lo que daveres significaba? Y lo que ye peor, ¿cómo dalguién llamáu Adolf Hitler nun pue ver nin en pintura la ideoloxía nazi?
Cuasi al mesmu tiempu que descubrieron la verdá sobre Hitler, la ultraderecha enteróse de qu’al europarllamentariu húngaru József Szájer, cargu de confianza del primer ministru d’ultraderecha Viktor Orbán, sorprendiólu la policía belga nuna fiesta que causó munchu escándalu. Los ultres nun son a creyer que los policíes nun tengan otru llabor meyor que vixilar los sos inocentes pasos, nun país como Belxica que sufre ún de los zarros más duros de la XE. ¿Por qué-yos sorpriende que 25 homes s’axunten, ente ellos diplomáticos, nun pisu pa llibrase del estrés? Y paez-yos fatal que digan que foi una orxía. Lo que debió pasar ye qu’entamaron a falar de fusilamientos y, ente caxigalina y caxigalina, acaloráronse tanto qu’inocentemente se desnudaron. Más nada.
¿Por qué los llamen hipócrites? La fiesta nada tien que ver con que la ultraderecha húngara tenga una cruzada anti-LXTB. Ye verdá qu’Orbán axuntóse al boicó dirixíu por formaciones y grupos d'estrema derecha y ultracristianos escontra un llibrín de cuentos pa neños porque los protagonistes yeren demasiao diversos ya inclusivos. Tamién ye verdá que l’añu pasáu, enantes del coronavirus, Hungría plantegóse nun participar nel festival d'Eurovisión porque’l cantante yera «demasiáu gai». Y nun nieguen que ficieron un boicó a Coca-Cola porque había nel anunciu una pareya del mesmu sexu, nin que la Ópera de Budapest se vio obligada a suspender 15 funciones del musical Billy Elliot tres una campaña homófoba patrocinada por un diariu próximu a la ideoloxía del Gobiernu húngaru.
La xente tien de comprender que l’oxetivu d’estes acciones ye acabar con esa «enfermedá». Esos mesmos periódicos dicen que la redada foi una «trampa» organizada por dalgún serviciu de’intelixencia estranxeru p’acabar cola «cruzada d’Hungría y Polonia escontra les decisiones de Bruxeles». Yo aconseyaríalos que pa otru día en cuenta de desnudase ficieren como los neonazis alemanes qu’usaron al Monstruu de les Galletes pa esparder la so ideoloxía d’estrema derecha ente los más mozos. Ye verdá que la policía de Brandemburgu acabó prendiéndolos cuando paseaben como’l personaxe azul de Barriu Sésamu repartiendo cartelos que dicíen: «Ser alemán presta», y que los policíes alcontraron más material neonazi nos ordenadores de los sospechosos, entre ellos un cuadru del Monstruu de les Galletes xunto a Adolf Hitler, según cuntó’l Daily Mail, pero al menos vistíen con munchu decoru.
¡Qué meyor pa un ultra que dir vestíu d’azul de la cabeza a los pies! Eso sí, espero que nun vuelvan a desnudase cola disculpa de que’l traxe ye peludu y da munchu sofocu. Volviendo al chat de los fusilamientos espero qu’a la ultraderecha española nun-y dea por fusilar tamién a los 25 emporricaos porque la decencia y la moral ta per enriba de fiestes y orxíes. ¿La prensa averada al réxime d’Orban convencerá de que l’affaire del emporricamientu ye una falsedá? Pasará tiempu enantes que veamos cómo termina esti culebrón. Agora que si los demócrates franquistes-yos xube’l sangre a la cabeza puen dir persignándose. ¡La derechita cobarde yá quedó nel pasáu!