Güei celebramos el 40 Día de les Lletres Asturianes. Un añu más organizaciones, sindicatos, partíos y sociedá civil de toles ideoloxíes, vamos salir a la cai Uría pa reclamar la oficialidá y vamos dir al Teatru Campoamor a sofitar el llabor de l’Academia de la Llingua Asturiana.
Un parte amplia y nesti momentu yá mayoritaria de la sociedá asturiana lleva cuarenta años reclamando dalgo tan simple como que se cumpla la Constitución española n’Asturies, que nel so artículu 3.2 especifica que les llingües distintes del castellán “serán oficiales en sus respectivas comunidades autónomas de acuerdo con sus estatutos”.
Nel horizonte d’esti Día de les Lletres tán unes elecciones que se presenten decisives pal futuru del asturianu y el gallego-asturianu. Per primer ocasión na hestoria, los partíos que se presenten cola oficialidá nel programa pueden sumar una mayoría suficiente pa reformar l’Estatutu d’Autonomía d’Asturies y permitir que l’asturianu y el gallego-asturianu tengan la posibilidá de proyectase hacia’l futuru con normalidá.
Foi un camín llargu dende que nes primeres elecciones autonómiques de 1983 nun tuviéremos nengún diputáu que llevara nel programa la oficialidá hasta güei, cuando apruz una posible mayoría que podemos tener dempués del 26 de mayu. Dende entós trabayóse abondo en munchos sectores culturales, sociales y políticos, siempres dende una perspectiva constructiva y de siguir sumando a más y más persones a esta causa xusta.
Nesti momentu tenemos la llave pa salvar esta llingua y la sociedá yá ye consciente na so mayor parte d’esta necesidá ética de conservar un patrimoniu del altor d’un idioma. Y tenemos de siguir trabayando pa convencer a les fuercies polítiques qu’entá nun se sumaron a la oficialidá: PP y Ciudadanos. Nun podemos construyir el futuru del asturianu ensin ellos, anque seya posible si dan los númberos.
Nun hai qu’inventar nada. Namás buscar un modelu propiu d’oficialidá, afayáu a les nueses cartacterísiques, como se fixo nes demás comunidaes autónomes onde hai llingües propies, sumando a izquierdes y dreches. Mui cerca, en Galicia, tenemos l’exemplu del PP de Fraga y depués de Feijoo, qu’impulsaron les midíes de normalización que fixeron que güei’l gallegu, con tolos problemes que sigue teniendo, tea en muncha meyor situación de la que ta l’asturianu.
El 17 y 18 de mayu, xusto en metá de la campaña electoral, Iniciativa pol Asturianu va organizar una segunda edición del Seminariu: Oficialidá, el camín constitucional de futuru pal asturianu, onde volveremos a tener a los meyores espertos falando de qué supón de verdá la oficialidá, ensin manipulaciones malintencionaes, enseñando les esperiencies d’ésitu que se dieron n’otros territorios y sobre too, señalando lo que ye una realidá, la oficialidá nun va suponer imposición nenguna pa la ciudadanía, sinón mayores cotes de llibertá, democracia ya igualdá, asina como munches oportunidaes pa recuperar l’autoestima, pa una Asturies que vive gacha y con tantos problemes.
Feliz Día de les Lletres Asturianes.