El fracasu de les polítiques de promoción de la llectura empobina a un baxu índiz de llectores na población. A la escontra d'esta tendencia hai instituciones como'l CEPLI, (Centro de Estudios de Promoción de la Lectura y la Literatura Infantil), d'ámbitu castellanu-manchegu que se dediquen al desendolcu de la investigación, la promoción, la mediación y l'animación llectores. Amás de formación del profesoráu non universitariu. Dan cursos, conferencies y seminarios. Puxen poles tesis doctorales nel campu lliterariu y promocionen la llectura en tolos ámbitos. GRETEL, (Grupu de Recerca de la literatura infantil y juvenil i educació literària) furrula dende Barcelona nel estudiu de les obres infantiles y xuveniles pa la formación del llector, la lliteratura dixital nesi sen, el deprendimientu lliterariu na escuela per aciu de proyeutos de trabayu, los vezos llectores, la interpretación de los llibros na escuela, y l'analís de los llibros pa primeros llectores. La FGSR (Fundación Germán Sánchez Ruipérez), de Salamanca, qu'ente otres actividaes entama un llaboratoriu contemporáneu de fomentu de la llectura. Esti proyeutu trabaya non focalizando'l fomentu la llectura en xeneral, sinón que pon en rellación delles de les variables más relevantes nel contestu d'anguaño. P'asina, xenerar conocencia ente los mediadores, movilizar idegues ente'l públicu xeneral y esparder documentación col resultáu de les conclusiones. Un sofitu d'interés ye la Biblioteca Virtual Cervantes qu propón portales temáticos sobre lliteratura, y munchos enllaces a sitios web rellacionaos cola mesma. Y tamién la campaña de Premios María Moliner d'animación a la llectura, empobinada pa llocalidaes de menos de 50.000 habitantes.
Sacante estos centros d'investigación, hai instituciones como'l Sevei de Biblioteques de la Generalitat de Catalunya, con una bayura de llinies d'actividá cincantes a la promoción de la llectura y la cultura, con más de venti proyeutos, delles llinies de clubes de llectura, esposiciones, concursos y premios, y conmemoraciones.
Nel ámbitu asturianu, sacante la Selmana de les LletresAsturianes, tán los premios lliterarios, los clubes y talleres de llectura, la web Biblioasturias, la revista Platero, delles feries del llibru llocales y presentaciones d'éstos, amás de delles actividaes bibliotecaries. Échase en falta una mayor normalidá nel sofitu institucional del país na producción y na receición lliteraria na lliteratura n'asturianu, con una mayor visibilidá nes biblioteques. Según l'Axencia del ISBN, asoleyáronse namái 82 títulos n'asturianu. La oncena llingua editada nel 2018 n'España. Ye evidente la falta de sofitos públicos pal so fomentu.
Paez qu'hai una falta de programación tanto a nivel estatal como autonómicu d'actividaes siguíes nel tiempu cola tema de la promoción de la llectura como exa cimera. Ello, sacante casos cuntaos como los citaos enriba. La falta de vezos llectores nos ciudadanos, ha compensase cola sema d'esa inquietú na reciella y la mocedá. Güei ye entá más difícil pola competencia de les redes sociales na mocedá y les hores pasaes énte la televisión de los adultos.
N'otros estaos europeos l'ecosistema cultural relluma. Nun fai falta más que mirase nellos y aplicar les lleiciones afayadices llograes al cabu de décades d'esfuercios na promoción de la llectura nello. Nel continente de la cultura hai llugares onde ésta tien furacos de formación básica. Nun ye enforma cola bona cantidá y calidá de los escritores que tenemos. Precísase d'un xorrecimientu d'eses cualidaes ente la población llectora: cuatro de cada diez españoles nun lleen enxamás un llibru, según el barómetru de vezos llectores y merca de libros de la Federación de Gremios de Editores de España, de 2018.Y l'enanchamientu d'ésta pa meyorar los estándares nuna sociedá que se diz miembru del continente más civilizáu. La sema de güei habría dar bonos frutos nel mañana, magar la seca de los tiempos que cuerren de pieslle de llibreríes.