A los 40 años de furrular n'España, Amnistía Internacional (AI) caltién l'oxetivu de meyorar los sos drechos humanos nel 70 aniversariu de la so Declaración Universal y que'l Gobiernu los respete. Nel so campu d'aición s'atopen la llibertá d'espresión, asociación y reunión, los drechos económicos, sociales y culturales,el drechu a la salú, a la vivienda, la violencia escontra les muyeres, la tortura y malos tratos, el retrocesu na xurisdicción universal, la memoria hestórica, el comerciu d'armes y la discriminación a los estranxeros.
No cincante a la inmigración y abellugu, denuncien les espulsiones en caliente, les sumaries y coleutives tán prohibíes nos trataos internacionales y la falta d'un procesu con garantíes d'escritu na llei d'estranxería. AI pidi que finen les práutiques d'espulsiones illegales y dean cunta de les violaciones de drechos humanes nes fronteres. Amás demanda la garantía del drechu al asilu, identificando persones con necesidaes de proteición internacional, presencia de traductores y facilitando l'accesu d'organizaciones que seyan quien a informar de los sos drechos.
No cincante a la discriminación, remembra que toos tenemos drechu a ser trataos por igual, dixebradamente de la nuesa raza, etnia, nacionalidá, clas, castra, relixón, creyencies, sexu, llingua, orientación sexual, identidá de xéneru, edá, estáu de salú o otres condiciones. Rescamplen les denuncies d'abusos y discriminación escontra ciudadanos estranxeros y de minoríes étniques. Asina como la discriminación pola mor de la relixón o creyencies de los inmigrantes. Sobremanera pa colos musulmanes. AI pidi respetu a la llexislación internacional y nun imponer torgues al usu de ropa o símbolos relixosos y culturales.
D'esta miente el Tribunal Européu de Drechos Humanos (TEDH) condergó ocho vegaes al Estáu pola vulneracón d'estos drechos nel 2018. No cincante al comerciu d'armes, calca qu'España robló y ratificó'l Tratáu Internacional de Comerciu d'Armes en 2004. Tamién denuncia con otres entidaes que les esportaciones d'armes puen contribuyir a facilitar les violaciones del drechu internacional humanitariu, ensin control nin tresparencia.
Indica qu'España fizo un apueste pol espoxigue na venta d'armes ocupando'l sétimu puestu del ranquing mundial. Y propón un cambéu na Constitución qu'incluya la nomada Riegla d'Oru del Tratáu sobre'l Comerciu d'Armes, el riesgu ente la rellación ente lo esportao y lo autorizao que pue contribuyir a cometer graves violaciones del drechu internacional de los drechos humanos.
España, como miembru de la Xunión Europea ha dar prioridá a los Drechos Humanos perriba del comerciu d'armes que puean utilizase en conflictos bélicos o represivos inxustos. Si'l Gobiernu quier una transición ecolóxica ¿por qué non una transición pacifista? Caltendría asina'l sofitu a la denuncia de Human Right Watch énte'l cumplimientu de la mayor crisis humanitaria nel mundiu. La Plataforma Armes Baxo Control, compuesta por AI, Oxfam Intermón, FundiPau y Greenpeace denuncien qu'España pue tornase en cómpliz de crímenes de guerra.
La llei 54/2007, art.8 afita nidiamente la prohibición de venta d'armes a países cuando esistan ñicios racionales de que s'empleguen en situaciones de violación de drechos humanos. Fechos acreitaos nos bombardeos d'Arabia Saudita sobre la población civil nel Yemen. Poro, estaos europeos como Alemaña, Los Países Baxos, Bélxica, Suecia y Noruega, restrinxeron total o parcialmente la venta d'armes a esti país. Abulta la sienda humanitaria a siguir.