Tamos nos tiempos de Samaín celta (del gaélicu «fin del branu»), na metada del equinociu de seronda y el solsticiu d’iviernu, nel que se fala de muertos y pantasmes. Una cellabración de cuantayá que se cristianizó en «Tolos santos» y anguaño cola globalización resurde col populismu americanu de Halloween.
La curuxa (Tyto alba) n’Asturies caltién un arniu de misteriu pergrande. Propiu del Samaín. El páxaru la nueche, l’ave quexona, el páxaru la muerte y otros apellativos nesi sen son ñicios d’un averamientu al mundiu de lo desconocío, al traviés d’un ave qu’abulta a muncha xente que paez una pantasma silente nocherniega cuando esnala. La curuxa que canta de mou llóbregu averada a una habitación, avísanos, na tradición, de la muerte de daquién de la familia. El so pasu perriba d’una casa prediz la muerte, sobremanera si hai una persona amalecida dientro, interprétase como’l glayíu de la tumba. Esto pasa tamién en Cerdeña y nel Friul. El so nome nes llingües xermániques europees denoten esti calter escuru: totenvogel «páxaru los muertos», lichvogel «páxaru los cadabres». Nes llingües del arcu atlánticu caltienen otru significáu. Asina en galés Tylluan sgubor ye la «curuxa’l graneru», n’escocés Cailleach-oihche gheal ye «vieya blanca nocherniega», mientres que n’irlandés Scréachóg reilige y en manx Screeghag oie ye onomatopéyicu. Pero la realidá ye que ye un animal que xinta grillos, saltapraos, escarabayos, royones como los mures, topinos, musgaños y mayormente rates, y páxaros pequeños como los gurriatos. Tamos delantre d’un bon raticida natural al que’l maxín tradicional asemeyaba a una pantasma. Suerte que güei la curuxa tea protexida pola llei estatal, como especie d’interés especial, cola amenaza de l’alteración del so hábitat pola restauración d’edificios vieyos onde añera, los atropellos y los tendíos llétricos ente otres. Nun solo la curuxa ye una pantasma na nueche, tenemos otres rapiegues nocherniegues como los miagones curuxos, curuxinos, curuxón rial, tubeques. Y toes elles son una ayalga natural del paisaxe de nueso, protagonistes del Samaín dende la borrina los tiempos.