Yá vimos el referéndum d’Escocia, dempués el Brexit. Agora los vecinos norirlandeses tamién quieren ser consultaos sobre les sos llendes.
La islla d’Irlanda foi dividida en 1921 calteniendo una parte en manes britániques, nomada Irlanda del Norte, mentes el restu formaba lo que dempués sedría la República d’Irlanda. Anguaño, col referéndum del Brexit, ábrese otra vuelta l’alderique de la xunión de la islla. Irlanda del Norte votó pol caltenese na Xunión Europea (lo mesmo qu’Escocia), con un 55,7% los votantes. Mentes nel Reinu Xuníu los favoratibles a la salida algamaron el 51,9%, ganando la consulta que derivó na dimisión el Premier británicu. El resultáu pue desestabilizar el procesu de paz. Asina, el Sinn Féin (segundu partíu d’Irlanda del Norte), como defensor cimeru de caltenese, declaró que “el gobiernu británicu nun tien mandatu democráticu pa representar la postura d’Irlanda del Norte en cualesquier futura negociación cola Xunión Europea y hai un imperativu democráticu pa convocar una consulta sobre fronteres.
Les implicaciones pa toos nós na islla d’Irlanda son pergrandes, sobremanera pa la nuesa economía”. Nesi sen, los xunionistes protestantes faen cola pa sacar pasaportes irlandeses en Belfast, mentes que los nacionalistes católicos faen una campaña abierta por una Irlanda xunida. 18 años dempués d’algamar la paz tres décades de llucha, la situación camuda. Munchos camienten na reapaición de les llendes con puestos de control militar, esapaecíes col alcuerdu de paz. Irlanda del Norte axúntase a Escocia pa garantizar un estatus especial de caltenimientu dientro de la Xunión Europea. Esta propuesta tien el sofitu del ministru d’Esteriores irlandés énte’l pelligru del desaniciu de les árees de cooperación norte-sur agora amenazaes. Amás ta l’impulsu pola llingua irlandesa, la primer llingua de la República y la segunda opción n’Irlanda del Norte. Magar tener estatus de llingua oficial na XE, namái’l 18% los diputaos de la República la falen (32 miembros). El Sinn Féin ye’l que más la emplega. Dase’l casu de que munchos republicanos deprendieron l’idioma nes cárceles norirlandeses, na nomada jailtacht, en referencia a les zones de fala esclusivamente irlandesa de la billingüe República d’Irlanda, les Gaeltacht. Anque agora pue estudiase nes escueles católiques, y na enseñanza media irlandesa, amás de la so mínima presencia na radio, y na BBC. La llingua ye obligatoria na educación, nel exércitu y na policía de la República, que tien una canal de TV nesti idioma asina como de radio. Dende los acuerdos de paz y la ratificación de la Carta Europea de les Llingües Minoritaries o Rexonales xorrecen los esfuercios por introducir l’irlandés nel Ulster británicu. El Taoiseach (primer ministru irlandés) plantegó la posibilidá de la xunión en comparanza a la cayida de la muria de Berlín. La cabera encuesta na República nesi sen algamó’l 65% de votos favoratibles a la xunidá, xunto a 5% d’indecisos. Agora ábrese la puerta non solo a la recuperación del irlandés sinón d’una Irlanda xunida porque según los alcuerdos de paz pue convocase un referéndum sobre la xunidá irlandesa si hai demanda enforma.