N'Asturies, igual que n'España y Llatinoamérica, el 28 d'aviento ye’l día los inocentes. La lienda diz qu'Herodes, obsesionáu en liquidar al futuru rei d'Israel y en siguir perpetuándose en poder, mandó matar a tolos neños de menos de dos años.
Ciertamente, nun hai nengún documentu históricu qu'acredite nada apaecío, anque ye polo qu'esti rei pasó a la historia; por eso y non por Cesarea, Masada o Herodión.
Pero nun ye en tolos sitios a finales d'aviento cuando la xente gasta bromaes. Nos países anglosaxones, Italia, Francia o Portugal ye'l primero d'abril; por eso n'inglés dícen-y «April Fools' Day».
Aquí paez que tamién nos quieren facer pasar por tontos, pero en setiembre. Esti día venía sintiendo na radio, camín del trabayu, a Jiménez Losantos (soi acérrime de Federico dende cuánta yá) que por culpa de Podemos yá nun hai trubiecos nos hospitales de Venezuela y a los neños tiénenlos abandonaos en caxes de cartón. La culpa -según Federico- ye de Pablo Iglesias, y Errejón, y Monedero, y Bescansa, y Luis Alegre, que marcharon con tol dinero del petróleo venezolano pa montar Podemos. «El gorila encarnáu» financiaba dende'l Palacio Miraflores el comunismo internacional mentres mataba de fame y necesidá al so pueblu. La broma nun acaba ahí: agora qu’en Venezuela -según Federico- acabóse'l negociu'l petróleo, la financiación va venir de les FARC, el cártel comunista que firmó la paz en pagu de quedar con una cuarta parte del país pa semar fueya de coca y atacar España de droga. Nos baños de Madril va surniase fariña fariano que nos llega pela Arxentina. Digo yo que los pijos de dereches tiraránse a la denominación d'orixe Sinaloa, por eso de la llucha de clases. Y ye que cualquier día sales de comedia y cuando llegues a casa de doblete y colos güeyos como un oso panda atópeste col soviet del Barrio Salamanca.
Sé qu'hoi tais pasándolo podre comigo, pero esperái, porque más gorda nun entra en prau. Llego a Corvera muertu la risa, aparco, apago la radio y resulta que me da por mirar el móbil primero d'entrar a escuela... Agora sí que lo entiendo too: el PP denuncia a los chiringuitos de Samateo por financiación ilegal de partíos. Como lo tas oyendo: el PP denuncia a Podemos y Somos por financiación ilegal. Resulta qu'Ana Taboada lleva toa esta montonera d'años trabayando infiltrada en Topu Fartón pa financiar a Somos. Tantu ruxerruxe pa qu’al final nos digan que la cobertoria nun yera La Mateína; son el Topu Fartón y el Pinón Folixa. Por eso los cargos públicos y los simpatizantes anónimos de Somos y Podemos llevamos tantos años trabayando infiltraos en chiringuitos que supuestamente ayudaben a dir tirando a colectivos, asociaciones de vecinos, deportives y nun sé cuántes coses más. Yá golíamos la xugada hai ventipicu d’años.
Los conceyales de Somos en conceyu d'Uvieo lleven donaos de los sos sueldos, namás nun añu, 18.000 euros pa proxectos sociales que xestionen organizaciones independientes na ciudá, pero resulta que financien el partíu vendiendo bocadillos de calamares conxelaos.
Esto cuéntanoslo'l PP carbayón, que lo más ético que fizo los últimos venti años pa siguir rucando foi votar colos comunistas -como-yos presta a ellos dicir- que nun se pudiera baxar el sueldu de los conceyales lliberaos.
Namás-yos faltó dicir que l'APARO montó l'ACF y poner de prueba a Chisco, que ye conceyal del PP y tolos años se pon una tarde tres la barra col resto los periodistas que siguen al Uvieo. Nesta ciudá nuestra algunos quieren que setiembre sea’l mes de los fatos, anque hai quien s’esfuerza por facer el ridículo tol añu.