Los alderiques culturales nun suelen gastar d'eso que llamamos términu mediu. Son un xuegu de too o nada, onde lo normal ye que lo anormal, por estravagante, gane la partida. Ye difícil contrarrestar boutades: nega-y relevancia a Shakespeare pue ser un puntu d’arranque interesante pa un aspirante a youtuber. Coles mesmes, los ataques d'esnobismu (tola alta cultura ye esnobismu desque la retórica dexó de ser marca d'elites) aumenten la cotización cultural del atacante na mesma medida en que lo faen cola víctima. Asina, tan rentable ye esprecetar de la televisión y negar el menor interés estéticu a creaciones como Twin Peaks, The Wire o Fargo, como defender ensin ponese coloráu qu'ente la Novena Sinfonía de Beethoven y el Dame Veneno de los Chunguitos nun hai nenguna diferencia. Xusto nes dos postures onde nun hai agua que sacar ye onde paez que'l calderu ta más llenu.
Por munchos y mui entrellizaos factores, ente los que nun falta la necesidá de dar emplegu a amigos con poques aptitúes pa sobrevivir nel mercáu llaboral, cuantayá que les alministraciones públiques vienen organizando feries y festivales culturales con escuses cualesquiera: la novela negra, el cine de terror, mui poques veces la música barroca o'l teatru clásicu. Los medios de comunicación atienden con un interés variable pa esos eventos, mandándose les más de les veces de personal precario y poco especializao. Como la universidá yá pinta mui poco nes movides culturales de les sociedaes líquides, el papel d'especialista súplelu davezu'l diletante, y más concretamente esa modalidá de diletante que resulta ser l'amigu nerd del conceyal de cultura o similar. Nun digo yo que la Florencia de los Médici nun gastara d'esos nepotismos, pero ocúrrenseme un par de diferencies qu'otru día igual vienen a cuentu.
Nun sé esactamente por qué la cultura de mases ta riñida col esfuerzu. Nun ye asina nel deporte, onde nun se-y dan medayes al atleta que vista con más gustu sinón al que salte más alto o al qu'arrefundie más lloñe la xabalina. Y cuido que na práctica deportiva tamién se tien en cuenta que pa llograr dalguna satisfacción hai que sudar y frustrase, que'l sudu y el fracasu son condiciones indispensables del entrenamientu y incluso del entretenimientu. En cambiu, nun ye raro por demás que'l mesmu aficionáu al ciclismu, que ye capaz de raspiar la deshidratación con tal de batir una marca personal, arreniegue de los llibros difíciles y pontifique sobre la necesidá de que la cultura (sic) seya fácil y (doble sic) divertida.
La de veces que me tengo preguntao «por qué lleo esta basura cuando podía tar deprendiendo de memoria Los hermanos Karamazov» (la frase nun ye mía, ye de Philip Marlowe nel últimu relatu qu'escribió Raymond Chandler, escritor «popular» onde los heba). La culpa téngola yo, esclusivamente, pero ye difícil sustraese al poder seductor de los medios, de los departamentos de márketing o de les redes sociales. Tamién influye dalgo asemeyao a la llei del péndulu, a la reacción que provoca alcuando la falsa profundidá, la vacuidá enmazcarada de complexidá o la estupidez endolcada de paraxismos y modales de ringorrangu. Pero lo qu'hai de los dos llaos de la báscula nun dexa de ser nadería, con disfraces diferentes pero nadería. Y la nadería (equí ta la paradoxa) ye aburrida, tanto si se disfraza d'artificiu retóricu como si lo fai de simplicidá playera. El branu da pie a abandonase a la nadería o a facer llimpieza, tirar lo que sobra, apostar polo difícil. Asina nel arte como na política.