Dempués de dos guerres mundiales y de les dictadures comunistes y facistes, Hungría llevanta una muria pa torgar que los refuxaos de la guerra entren na Xunión Europea.
Mohamed y la so fía Fátima, aportaron a la valla tres pagar a una mafia pol viaxe a Turquía y facer el camín a Serbia dende Grecia. Munchos quilómetros pa una familia quebrada, ensin casa, ensin má, ensin muyer, por culpa de la violencia fondera qu’abrasa’l so país, condergándolu a ser un ermu más.
Galdíos, ven cómo Europa piéslla-yos el pasu. Nin siquier puen demostrar que son auténticos refuxaos. Que fuxen de la muerte, que deberíen estudiar el so casu y acoyelos. Con cuotes o como seya, pero non abandonalos tres una verxa con cuchielles, feches n’España, que-yos ofiende entá más. Cansos, siéntense xunto a un montonáu de persones más, que nun saben cómo entrar nel supuestu paraísu occidental. Fátima ve una cosa sobre la parte superior de l’alambrada. Muévese. Ye un raitán, enxamás nun viera ún. Tien el pechu colloráu y nun tien llercia, avérase y allóñase esnalando perriba la valla metálica que nagua por dividir el mundiu en dos nesi momentu. Fátima riye. Señala al raitán cola mano y Mohamed amuésa-y los sos dientes, dellos frayaos, pero agradecíu. Inda hai esperanza. Si un paxarín pue saltar la frontera quiciabis ellos tamién. Pieslla los güeyos y túmbase abrazáu a la so fía embaxo una vieya manta que-yos regaló la so esposa. Un coche de la cruz bermeya serbia alcuéntralos y llévalos a un tren que va p’Austria, dícen-yos. La vida sigue y la llucha continúa. Miren pela ventana. Tienen suerte y aporten al so destín. Tovía nun hai valles nesi país y abellúguenlos nunes tiendes de campaña, enantes de facelo nun edificiu pa refuxaos onde nun falta de nada, a los sos güeyos. Por suerte n’Alemaña necesiten inxenieros informáticos que dominen l’inglés. Mirando pel ventanal del despachu, ven otru raitán que paez sonreyilos a mou de bienllegada. Ellos foron los primeros. Namái unos pocos llográronlo. El restu son escombrios o angustia y sobre too llarga espera, na qu’Europa dexa vergoñosamente de llau los drechos humanos de les persones refuxaes nes puertes de Turquía y fai del drechu d’asilu papel moyao.