Mayoría de xente partidario d'abandonar la UE nel Reinu Xuníu. Brexit. Primer consecuencia: que na campaña electoral española se fale (un poco) d'Europa, telón de fondu inoráu por inflamable. Ok. Segunda consecuencia: sarapicu patrióticu d'un ministru que siente Gibraltar más cerca que nunca pero nun diz de qué. Tien poco que facer: en materia de ministros, tolo que nun sía Jorge Fernández Díaz ye perder el tiempu.
Toles demás reacciones puen incluise nes categoríes siguientes: l'insultu puru y duru, la socioloxía ficción, la llírica psicotrópica y, tresversal a toes elles, la propaganda electoral. Esta última, en realidá, nun ye una categoría, sinón un xéneru lliterariu. Y un síntoma más de que, a ríu revueltu, ganancia de conservadores.
Insultu puru y duru: considerar a los británicos egoístes, xenófobos, babayos, non necesariamente nesi orde. Que ye lo que suel pasar cuando los demás voten lo contrario de lo qu'ún quixera. Pue facese'l reproche estensivu a toles etnies y nacionalidaes: la culpa ye del pueblu, que nun sabe lo que vota. Triunfu del populismu, tengo lleío per ende (valía más dicir que la culpa ye de Podemos y acabábemos antes). Hai quien destaca tamién qu'en Londres ganó'l bremain y que la culpa ye de la Inglaterra profunda, del inglés de los páramos, que ye poco más o menos como dicir que n'España gobierna'l PP por culpa de los d'Ávila o los de Segovia.
Socioloxía ficción: parapsicoloxía aplicada. Quien más quien menos, tol mundu llee la mente de los votantes, claro qu'a posteriori. Los resultaos puen lleese en términos favorables a les polítiques más conservadores (la culpa ye de Merkel por nun poner frenu a la inmigración y a les demandes d'asilu) o a les más progresistes (la culpa ye de Merkel por aporfiar na austeridá y nel modelu d'una Europa insolidaria). Ello ye que los británicos votaron contra los inmigrantes o contra'l neolliberalismu, dependiendo de con quién fales. Les pruebes pa uno y pa otro, inesistentes.
Llírica psicotrópica: melancónicu discursu con pompa y música de Beethoven sobre lo guapo que ye Europa y lo incomprensible de querer abandonar esti paraísu na tierra. Tamién ensin pruebes, y con confusión de términos: Gran Bretaña nun pon rumbu a Groenlandia, y tampoco va prohibise tener tratu cola cultura europea, quitando que'l gobiernu español en funciones prohíba les chancles con calcetos nes playes baleares.
La mayoría d'eses reacciones tiende a negar l'únicu datu empíricu col que contamos, a saber, el resultáu del referéndum, pal que nun hai marcha atrás nin posibilidá d'interpretaciones ambigües (anque yo eché de menos nos xerarques españoles esi sutil argumentu de les mayoríes cualificaes, tan remanáu cuando se trata d'un hipotéticu referéndum catalán). A la lluz d'esi resultáu, lo que toca ye ponese a xestionar esi divorciu con un mínimu de racionalidá, dalgo que nun abunda, y un muncho d'espíritu empirista, un enfoque de patente británica, por más que nos duelga. Y abrir un debate non yá sobre cómo reformar la UE sinón sobre qué ye esactamente la UE, cuáles son les sos funciones, qué rellación tien cola moneda única y qué futuru-y espera si lo que va unos meses yera imposible pa los griegos y los escoceses acaba de facése-yos realidá a los británicos, escoceses incluyíos.