Artículu d'opinión de Miguel Fernandi
27 mar 2018 . Actualizado a las 15:07 h.«Queda muncho, queda muncho» lleves repitiendo obsesivamente dende'l mes d'agostu. «Queda muncho» dixisti en setiembre, ochobre, payares y avientu. Siguíes enfotáu en que quedaba muncho y repitíeslo nel parón de les navidaes. «Queda muncho» insististi en xineru y en febreru. Entamó marzu y siguía quedando muncho hasta qu'empecipió esta selmana. Yá nun queda muncho, yá nun hai tranquilidá, yá nun hai marxe d'error. ¡Parái les rotatives! ¡Yá nun queda muncho! ¡Queden diez partíos!
Yá nun puedes pensar n'otra cosa. Anantes disfrutabes de les selmanes, falabes de la capacidá de crecimientu del equipu, nun echabes cuentes, valorabes cualquier empate, incluso cualquier derrota si la imaxe del equipu yera buena. Agora yá non, acabóse. Olvídalo too.
Sólo quies que se xueguen esos diez partíos y que se xueguen yá. Firmabes que los diez partíos se xugaren diez díes siguíos pa quitalo de delantre y saber si'l to equipu va metese en play-off o va xubir directu. Date igual que l'equipu medre o xuegue pior, eches cuentes a cada minutu, los empates sábente a nada y perder ye casi entregar la temporada y despidise de cualquier opción.
Van ser dos meses y mediu horribles y sábeslo. Otru final de campeonatu agónicu. Hasta l'últimu minutu del últimu partíu vas tar con esi sentimientu que casi nun te dexa respirar. Y sabes que vas tar obesivamente falando d'ello a toes hores cola to pareya, colos tos amigos, colos compañeros del trabayu, con cualquier persona que se ponga al to llau en chigre...
¿Sabéis lo que vos digo? Que yo toi paecío pero que sigue quedando muncho.
