Artículu d'opinión de Miguel Fernandi
28 feb 2018 . Actualizado a las 20:33 h.Trés partíos, dos derrotes y un empate. Lo que ye lo mesmo: un puntu de nueve. «¡Meca, l’acabóse! Porque tenemos 45 puntos que sinón baxamos a 2ªB» ye algo que seguro se puede sentir estos díes na barra de cualquier chigre. La capacidá d’un sector del oviedismu pa pasar del blanco al negro ye increíble y un factor a estudiar. Como diz un amigu míu: «l’oviedismu nun ye bipolar, ye ‘tripolar’, vive na esquizofrenia constante».
Pero, reconozámoslo, quiciás eso forma parte de la identidá, del fechu diferencial y ye’l resultáu de más d’una década de pelea, llucha y sacar la cara cada día por un equipu de fútbol que tuvo al borde de la muerte más d’una vez no económico y onde les alegríes deportives nunca tuvieron a la orde del día.
Y agora na LFP puedo entender el mieu a que la llucha polos puestos d’ascensu pueda volver a escapase ente los deos de les manes como les dos temporaes anteriores. Oxetivamente ye algo que puede volver a pasar porque esto ye un xuegu nel que compiten más equipos. ¿Hai razones oxetives pa relacionar les dos ocasiones anteriores con esta? Nenguna.
Paremos, pensemos y démos-y una vuelta. Trés partíos, dos derrotes y un empate… ¿En Cádiz? Derrota dando la cara y xugando con diez más d’una hora. ¿En casa? Depués de nun sé cuántos partíos siguíos ganando llega un empate nel típicu partíu atascáu como local que sal mui de xemes en cuando. ¿En Zaragoza? Primer tiempu igualáu y depués un gol de killer y otru en propia…
Val, que sí, que l’equipu ta más atascáu y fálta-y «frescura técnica». ¿Que la banda derecha lleva un mes regulín? Dizlo hasta Diegui. Pero, ¿d’ehí a baxar los brazos? Mirái, hai tantos enfrentamientos directos esta xornada qu’entra -y les que vienen- qu’hasta perdiendo contra’l Barça B l’equipu siguiría coles opciones intactes.
¡A tranquilizase y a siguir enfotaos nun equipu que puede facer historia! ¡Y el vienres al Tartiere!
