Artículu d'opinión de Miguel Fernandi
14 feb 2018 . Actualizado a las 10:44 h.6000 euros, cientos d'hores emplegaes y too pa diez minutos. Esi ye'l resume, mui resume, del espectacular mosaicu ('tifo' na llingua de les graes) que'l grupu Symmachiarii preparó pal derbi contra'l Sporting. 15000 cartulines azules y 10000 cartulines blanques pero, sobre too, una llona onde s'amosaben dalgunos de los edificios y monumentos históricos de la ciudá d'Uviéu combinaos col míticu Patán.
La pregunta ye: ¿mereció la pena? La respuesta: pa los que nos gusten les coreografíes nes graes, sí, ensin llugar a duldes. La otra pregunta ye: ¿valió la pena pa tan poco tiempu? La respuesta: ta prohibío nes regles de les graes reclicar los grandes tifos, quitando les 'manibanderes', pa usalos pa otru partíu. Ye de cutres volver a facelo.
Y yo pregúntome: ¿nun pueden tener otru destín que la basura los miles de metros cuadros de tela usada? Nun tengo nin idea de la conservación d'ello, nin si dura muncho o a los pocos díes 'despinta' pero ye una pena que nun pueda esponese selmanes depués y más cuando tol públicu qu'acudió al Tartiere coincidó na guapura del diseñu.
¿Podría habilitase un llugar n'El Requexón? ¿Podría colgase nel esterior del Carlos Tartiere? ¿Buscar la manera de dexar el mosaicu colgáu en dalguna muria ensin usu de la ciudá? Munches preguntes pa quien nun tien muncha idea del asuntu y que-y gustaría que nun quedara pa l'alcordanza nun videu o nunes fotografíes, anque namás fuera unes poques selmanes.
Tifos aparte, Pulidos Santanas aparte, el sábadu l'Oviedo tien otra batalla. Con tifo o ensin tifo, l'afición tien que plantear el partíu como otru derbi, buscando enllenar el Carlos Tartiere y apoyando a un equipu que se parte la cara y dexa l'alma ellí onde xuega. Un mira a la clasificación y mete mieu la igualdá, cada puntu va costar sangre, sudu y llárimes. ¡A por ellos!
