Artículu d'opinión de Miguel Fernandi
20 dic 2017 . Actualizado a las 13:55 h.Corría l'añu 1984 cuando Enrique Tierno Galván, alcalde de Madrid, apaeció nel escenariu del Palaciu de los Deportes en metá d'un conciertu de la llamada «Movida madrileña». Ellí, el máximu dirixente de la ciudá, garró'l micro y pronunció una d'eses frases que pasaron a la historia «Rockeros: el que no esté colocado, que se coloque. Y al loro».
Consumos d'estupefacientes a parte, l'oviedista que nun quiera celebrar la racha de resultaos... ¡Que la celebre! Ta mui bien, y comparto, el mensaxe dende dientro del club de tranquilidá, de qu'esto ye mui llargo, de que yá se vio lo que pasó otres temporaes. Toi d'alcuerdu. Pero la calma pal Conseyu d'Alministración, el cuerpu técnicu, los futbolistes y los empleaos del club. Pa l'afición non, l'afición que lo celebre y que vaya'l sábadu al Carlos Tartiere a pasalo bien y a disfrutar.
Contra la Cultural Leonesa va dispidir l'Oviedo un añu qu'acaba bien. L'equipu ta nuna racha de resultaos espectacular con cuatro victories de siguío per primer vez desque volvió a la LFP, con seis partíos ganaos de los últimos siete. Pero colo más importante: un equipu que vuelve a ser reconocible, que nun baxa los brazos pesie a quedar con unu menos a los 16 minutos, que torna los balones de cabeza anque acabaren de cosé-yosla a Carlos y a Folch... Y que celebra los triunfos con una afición que crucia la Península pa dir a apoyalos. Un equipu con arguyu, valor y garra.
Depués d'años de frustraciones llegó'l momentu de sonriir. El fútbol ye raru y caprichosu y lo que güei son alegríes, mañana pueden volver a ser lloros. Ansí que nunca ye malo disfrutar del momentu y aprovechar la barra llibre de bonos sentimientos.
El sábadu al Carlos Tartiere cola bufanda en pescuezu. ¡Y el que nun la tenga colocada, que la coloque!
