Después de los ataques del PP, Santiago García Granda califica la llingua como «un pegollu fundamental de la nuestra identidá»
15 mar 2018 . Actualizado a las 13:51 h.El rector de la Universidá d'Uviéu, Santiago García Granda, afirmó que la institución que preside tien la «obligación» de «puxar»pol futuru de la llingua asturiana. «Lo contrario diba ser una irresponsabilidá que la sociedá asturiana diba reprochanos», indicó.
García Granda presidió esti xueves l'actu de presentación del «Diccionariu Etimolóxicu de la Llingua Asturiana», obra del catedráticu Xosé Lluis García Arias qu'edita la Universidá d'Uviéu en collaboración cola Academia de la Llingua Asturiana.
Amás del rector y el mesmu Arias, nel actu tamién participaron el presidente de l'Academia, Xosé Antón González Riaño; y el catedráticu Michael Metzeltin, ún de los máximos espertos mundiales nel estudiu de les llingües romániques. Otra manera, ente'l públicu taben dirixentes políticos como la diputada d'IX Concha Masa, el portavoz de Podemos Asturies Emilio León o'l conceyal de Cultura d'Uviéu, Roberto Sánchez Ramos.
El rector quixo poner en valir la collaboración «tan bona» ente la institución qu'él dirixe y l'Academia de la Llingua. Una collaboración «qu'espero que faiga posible munchos llogros como esta obra», en referencia al Diccionariu Etimolóxicu.
Asina, calificó la obra como una ferramienta «mui valiosa» pa los espertos, «pero tamién pa tolos asturianos», y dixo que ye un trabayu «que nos permite lluchar contra l'escaecimientu» y un «perimportante llogru pa la llingua y la cultura d'Asturies».
Nesi sentíu, calificó l'asturianu como un «pegollu fundamental de la nuestra identidá» y como un «legáu de los nuestros ancentros» que nun se pue dexar de llau. Amás, García Granda quixo dexar claro que la Universidá tien la «obligación» de «puxar»pol futuru de la llingua asturiana, «lo contrario diba ser una irresponsabilidá que la sociedá asturiana diba reprochanos».
Les declaraciones del rector surden díes depués de que'l secretariu xeneral del Partíu Popular d'Asturies, Luis Venta, criticara que la Universidá d'Uviéu sumárase a la «imposición» del asturianu, depués de que'l rector inaugurara un seminariu sobre los beneficios de la oficialidá.