Emilio León cree que la oficialidá «sí ye posible» nesta llexislatura con la modificación del Estatutu
09 nov 2017 . Actualizado a las 13:13 h.El portavoz de Podemos Asturies, Emilio León, afirmó que nestos momentos ta abierta una oportunidá pa que «por fin» l'asturianu sía llingua oficial. «Veremos si'l cambiu d'actitú del PSOE facilita esa modificiación», señaló León, qu'espera que «si ye posible» sía nesta llexislatura.
Asina, esti xueves n'Uviéu, el portavoz de Podemos Asturies, señaló que la so formación piensa que s'abre una «mui bona» oportunidá pa que «por fin» se reconoza «amás d'un derechu al que tien que satisfacer l'Alministración», el derechu de les persones a falar «como falaben los sos güelos». Afirmando amás qu'espera que, «si ye posible», la oficialidá llegue nesta llexislatura.
León recordó que tolos grupos políticos pudieron ver na «Comisión especial d'estudiu sobre'l réxime de protección y promoción del asturianu» de la Xunta Xeneral que les polítiques llingüístiques feches hasta'l momentu polos Gobiernos asturianos socesivos «fracasaron». «Por eso, ye una oportunidá de introducir el asturianu más allá de cuestiones partidistes y ideolóxiques y empezar a velo como un patrimoniu», declaró.
Asina, espero que'l «cambiu» del PSOE facilite la modificación del Estatutu «que garantizaría l'usu del asturianu y el que fuera una asignatura troncal nel sistema educativu». «A partir d'ehí, sería una cuestión mínima, porque ye una cuestión de política llingüística y prestaríenos que'l cambiu del PSOE falicitara también un cambiu na postura del PP», indicó León.
El portavoz de la formación morada calificó la posición del PP contra la oficialidá como una posición «ultramontana» que nun s'entiende «porque en Galicia apoyen la oficialidá de la llingua mentes que n'Asturies nun permiten que se fale asturianu». Asina, afirmó que ye'l momentu de que'l PP revise les sos posiciones «y tome llecciones sobre lo fecho en normalización llingüística a lo llargo de los últimos 30 años».
León recordó que, amás d'en Galicia, el PP gobernó na Comunidá Valenciana y llevó alantre midíes de política llingüística pa desarrollar la oficialidá de la llingua propia recoyida nel Estatutu d'Autonomía. «Podíen tomalo d'exemplu», señaló, p'añadir qu'espera que los momentos que se tán viviendo afalen un clima «nel que l'asturianu dexe de tar dientro de les disputes partidaries y pase a ser reconocíu como un derechu humanu, ciudadanu y un patrimoniu de toos y de toes».
Per otru llau, nun quiso entrar nel papel que taba xugando la política llingüística nes negociaciones presupuestaries, porque eso ye un tema «coxuntural» y afirmó que l'asturianu ye dalgo que «tresciende» una negociación presupuestaria. «L'asturianu necesita un alcuerdu lo más ampliu posible», sentenció León.