Militantes socialistes presenten una enmienda pa que la FSA asuma la oficialidá nel so Congresu

Un grupu de militantes socialistes, axuntaos baxo'l nome de «Socialistes pola Oficialidá», va presentar una enmienda pa que la FSA-PSOE asuma la oficialidá del asturianu nel marcu del XXII Congresu Autonómicu del partíu, que se va celebrar los díes 29 y 30 de setiembre y el 1 d'ochobre.

Mari Luz Pontón, militante de l'agrupación socialista d'Uviéu y afín a Adrián Barbón, y Xuan García Vijande, de l'agrupación de Morcín y partidariu de José María Pérez, presentaron esti miércoles na Casa del Pueblu d'Uviéu'l grupu «Socialistes pola oficialidá», que busca que de manera tresversal y independiente al procesu actual de Primaries, la FSA apoye la oficialidá de la llingua asturiana

Esti grupu de militantes va presentar una enmienda de sustitución al artúiculu 367 de la ponencia marcu del XXXII Congresu de la FSA. La enmienda, que van presentar a toles agrupaciones locales pa que llegue al Congresu col máximu apoyu posible, quier que'l PSOE asturianu defienda la oficialidá de la llingua nel momentu nel que se produza una reforma del Estatutu d'Autonomía.

Según los sos promotores, la defensa de los derechos llingüísticos tien que ser una seña d'identidá de los socialistes, «como lo foi'l matrimoniu igualitariu o la llei de dependencia». García Vijande esplicó que la FSA tien que siguir el camín del partíu n'otros territorios billingües, «onde los socialistes son exemplu na defensa y promoción de les llingües diferentes al castellanu».

Del mesmu mou, señaló que nestos momentos hai una mayoría grande d'asturianos que quier la oficialidá y existe un «consensu social» sobre la necesidá de tomar midíes pa conservar y recuperar la llingua asturiana. Asina, faló de la oficialidá como un pasu natural nel procesu de recuperación del nuestru idioma.

Tamién esplicó qu'ensin oficalidá «nun hai normalización» porque «ensin ella nun hai reconocimientu pol Estáu de los derechos llingüísticos de los asturianos». Coles mesmes, afirmó que nun hai nada peor «qu'una llei que nun se cumple y la Llei d'Usu y Promoción del Asturianu, aprobada nel añu 1996, nun se cumple».

Una llei que según Vijande tuvo mui bien nel so momentu, «pero agora toca caminar a un marcu xurídicu nuevu en que los derechos tean reconocíos».

Per otru llau, Pontón fixo un llamáu a los militantes socialistes y a los mesmos candidatos a secretariu xeneral pa qu'apoyen públicamente esta iniciativa. «Les élite de la FSA van cambiar; ye un tiempu nuevu, un tiempu de cambiu, cambien les persones y hai otros proyectos», esplicó Pontón.

Coles mesmes, indicó que yá hubo contactos con Adrián Barbón y José María Pérez, «porque nesti grupu de militantes pola oficialidá hai xente de les dos candidatures».

Otra manera, Vijande recordó que «Socialistes pola Oficialidá» ye un movimientu que sal de les mesmes bases del partíu «pero hai xente importante que se ta sumando».

Ente los asistentes al actu d'esti miércoles n'Uviéu taben Diego Valiño, conceyal del PSOE nel Conceyu d'Uviéu; Silvino González Fernández, secretariu de Política Municipal n'Uviéu; y Victoria Fernández Pérez, secretaria d'Educación n'Uviéu.

Ente los simpatizantes d'esta propuesta figuren nomes como Xosé Ramón Ardines, secretariu xeneral del PSOE en Samartín del Rei Aurelio o l'eurodiputáu Jonás Fernández.

---

---

---