El Principáu entama'l programa pa promover vezos saludables y reducir la obesidá
14 sep 2019 . Actualizado a las 09:40 h.Cuasi mil escolinos y cuasi cien escueles d'Asturies van participar esti cursu nel programa européu de fomentu del consumu de lleche pa promover vezos saludables y reducir la obesidá.
La Conseyería de Desarrollu collaboró colos departamentos d'Educación y Salú pa llograr que'l númberu d'escolinos participantes perpasara'l 57%.
Según informó'l Principáu l'oxetivu d'esti programa, financiáu con 76.000 euros pa esti cursu académicu, ye favorecer la meyora de los vezos alimenticios y tamién la nutrición saludable del alumnáu, col envís de reducir la obesidá y otres enfermedaes. La iniciativa ta empobinada a menores de 3 a 16 años, que van recibir nos mesmos centros educativos lleche pasteurizao o UHT, yogures naturales ensin zucre amestao nin edulcorantes.
Dáu l'aumentu del númberu de centros y alumnos inscritos, tamién aumentó'l presupuestu del programa, financiáu al traviés del Fondu Européu Agrícola de Garantía (Feaga), al pasar de los 34.302 euros del cursu pasáu hasta los 76.000 d'esti.
Esta iniciativa de promoción de vezos saludables col repartu de lleche pasteurizao o lleche UHT y yogures va complementase col programa de distribución gratuita de fruta, verdures y plátanos nos centros. Entamáu nel 2014, esti programa cuntó'l cursu pasáu cola participación de cuasi 22.000 estudiantes de 176 centros.