La obra «Les rellaciones peligroses» ye una obra que xune drama, humor y pedagoxía pa dar a conocer la manera en que la mocedá encara los peligros del mundu de les tecnoloxíes nueves y les redes sociales
03 dic 2019 . Actualizado a las 17:13 h.La compañía Factoría Norte ye la ganadora de la tercer edición del premiu Nel Amaro de Teatru Profesional en llingua asturiana y gallego-asturianu, que concede'l Gobiernu asturianu, cola obra Les rellaciones peligroses. El xuráu encargáu de valorar les obres finalistes axuntó baxo la presidencia del director xeneral de Política Llingüística, Antón García, y tuvo formáu por Eva Vallines Menéndez, actriz y crítica teatral; Esther Castro Manzano, filóloga; Cristina Muñiz Martín, escritora; José Ramón Iglesias Cueva, secretariu de l'Academia de la Llingua Asturiana, y Roberto Corte Martínez, director y críticu teatral.
Ente les cuatro obres finalistes, que se representaron a lo llargo del mes de payares nel Teatru Filarmónica d'Uviéu, el xuráu decidió por mayoría conceder el gallardón al espectáculu Les rellaciones peligroses, valorando «el brillante exerciciu d'interpretación y l'axilidá y fluidez llingüística con que se desenvuelve una obra mui bien conxuntada qu'analiza en clave de comedia llixera la incomunicación que vive una sociedá tan interconectada», según destaca l'acta. El xuráu quixo tamién remarcar la «enorme calidá de toles obres finalistes, lo que dificultó enforma la decisión». Escrita y dirixida por Eladio de Pablo, Les rellaciones peligroses ye una obra que xune drama, humor y pedagoxía pa dar a conocer la manera en que la mocedá encara los peligros del mundu de les tecnoloxíes nueves y les redes sociales, la iniciación a la so vida sexual y los prexuicios sobre la identidá de xéneru de les persones, según informa Europa Press.
Factoría Norte ye una productora y compañía profesional de teatru y danza asturiana. Inició la so trayectoria en 1998 cola idea de producir espectáculos nuevos y entamar eventos artísticos pa difundir movimientos creativos que, por falta de tradición n'Asturies, yeren más desconocíos pal públicu. A lo llargo de la so carrera, la compañía representó una trentena d'espectáculos, munchos de los cualos recoyeron premios dientro y fuera d'Asturies. A esti premiu, dotáu con 6.000 euros, podíen presentase empreses del sector profesional dedicaes a la producción y representación d'espectáculos teatrales, teniendo cabida tanto los espectáculos orixinales como les obres dramátiques yá esistentes y les versiones o adaptaciones d'espectáculos representaos orixinalmente n'otra llingua.