Paquita Suárez Coalla publica la so primer novela xuvenil 'Paecen esguiles'
CON C DE CIENCIA Y CULTURA
La obra recueye escenes de la vida cotidiana nun branu rural y máxicu na Asturies del sieglu XXI
06 jul 2019 . Actualizado a las 10:29 h.La escritora Paquita Suárez Coalla acaba de publicar con Ediciones Saltadera la so primer novela xuvenil: 'Paecen esguiles', sobre una neña de Nueva York que pasa en pueblu les vacaciones cola familia.
Según señala Saltadera en nota de prensa, la novela recueye "escenes de la vida cotidiana vistes dende la perspectiva intelixente d'una autora que narra con atención a los detalles y una mirada allegre y crítica".
"Un branu rural y máxicu na Asturies del sieglu XXI. Una neña de Nueva York pasa en pueblu les vacaciones cola familia, descubriendo un mundu a la midida de los sos güeyos", indiquen, lo que supón "una reflexón sobre'l sentimientu de pérdiga y la so aceptación, la pasión pola tierra y el pesu de les decisiones que van dar calce a una vida".
Paquita Suárez Coalla (Grullos, Candamu, 1965) ye escritora, traductora y profesora d'español na B.M.C.C City University de Nueva York. Ente les sos obres destaquen 'La mio vida ye una novela' (2001), 'Pa nun escaeceme' (2003) y 'El día que nos llevaron al cine' (2007). En 2011 ganó'l premiu María Josefa Canellada de lliteratura infantil col llibru ¡Camín de lletres: d'Asturies a Nueva York¡ (2012).