Los trabayos van sirvir pa ellaborar un rexistru arqueolóxicu agora inesistente
25 jul 2023 . Actualizado a las 00:24 h.La Conseyería de Cultura, Política Llingüística y Turismu avanza nos trabayos de caltenimientu y investigación de los castros de Cuaña y Mouguías. Nel primeru, anguaño sigue la campaña prevista pa esti añu, mientres que nel segundu los trabayos contemplaos nel Plan de la Cultura Castreña van empecipiar en setiembre. Estes actuaciones tán dirixíes a recuperar una visión llimpia de les ruines y a ellaborar un rexistru arqueolóxicu, agora inesistente, que permita realizar una llectura solvente de los dos xacimientos.
El director xeneral de Cultura y Patrimoniu, Pablo León, visitó esti llunes los dos castros acompañáu de los técnicos que coordinen les escavaciones. Nel casu de Cuaña, los llabores efectuaos nos últimos meses permitieron la exhumación completa del edificiu identificáu como númberu 84, afayáu en 1991 y del que nun se tenía información sobre'l so rexistru arqueolóxicu.
Coles mesmes, encetóse l'ampliación del área escavada na redolada inmediata. Los datos llograos, xunto con una meyor definición topográfica del sistema defensivu, van apurrir información nueva a la base documental del xacimientu y van favorecer la integración de les estructures identificaes na propuesta de musealización del conxuntu.
Amás, nesta campaña lleváronse a cabu la llimpieza y la documentación fotográfica y planimétrica de la superficie del xacimientu, escavada manualmente pa desaterrar la construcción y la redolada. Tol procesu foi documentáu de manera refecha y realizáronse muestreos pa posteriores estudios d'orde paleoambiental, analís radiométricos de delles amueses, y el sigláu y estudiu de los materiales arqueolóxicos. Los técnicos valoraron tamién les patoloxíes y los problemes de caltenimientu de les estructures detectaes nel castru.
Tocantes a los trabayos de caltenimientu previstos nel xacimientu de Mouguías, les obres que se van empecipiar en septiembre tienen como oxetu la exhumación integral de les construcciones 8 y 9 del castru, y la regularización del área escavada na redolada. El serviciu de Patrimoniu va llevar a cabu la documentación gráfica de los espacios sondiaos, tomar muestres pa posteriores estudios d'orde paleoambiental y análisis radiométricu de trés d'elles. Igualmente, va recoyer nun informe'l diariu d'actividá, el rexistru estratigráficu y la documentación gráfica de la intervención.