«Desque refugamos les cases d'apuestes hubo un repunte de persones y comercios que nos contactaron pa sofitar»

El Rosal F. C. es un club diferente. Se trata de un equipo que representa a la perfección los valores del fútbol popular, que reclama atención para el deporte y se aleja de los destellos del marketing que cada vez más rodea a la pelota. Esta semana ha comenzado su campaña de patrocinios sin dar siquiera opción a participar a las casas de apuestas. Mientras este tipo de publicidad prolifera la directiva formada por María Xosé Martínez e Iyán Castro prefiere apostar por otro tipo de mecenazgo que no genere adicciones «qu’afeuten cada vegada a más mocedá».

- ¿Por qué decidieren rebelase escontra’l patrociniu de les cases d’apuestes?
-El Rosal FC ye un club nel qu’intentamos, na midida de les nueses posibilidaes, nun ser ayenos y ayenes a la realidá social de la nuesa redolada. Como persones aficionaes al fútbol y comprometíes socialmente vemos con esmolición cómo, nos últimos años, la presencia de les cases d’apuestes en tolo qu’arrodia al deporte que nos apasiona ta condicionándolo too: fichaxes y llímites salariales, retransmisiones, horarios de partíos, publicidá agresiva, redes mafioses de compra-venta de resultaos… Al tiempu, esto tien un reflexu na sociedá: vemos qu’esti fenómenu pon a menores, persones adultes, families y a tola población nuna situación d’altu riesgu económicu pero tamién sanitariu, xenerando adicciones qu’afeuten cada vegada a más mocedá. Impugnamos direutamente’l conceutu de “xuegu” pa falar d’estes espresiones económiques que lo que traen son problemes y ruina social a curtiu, mediu y llargu plazu. L’ociu ye incompatible con ganar o perder perres d’esta manera tan individual, que nos desarraiga y que nun xenera nengún tipu de bien pa la comunidá.

? Munchos clubes de categoríes superiores sí aceuten la so publicidá. ¿Qué vos paez?
-Dende’l Rosal FC nun entramos a xulgar lo que faen otros equipos. Sicasí, ye bien ilustrativo que l’únicu equipu de primera división que consultó a la so afición pol patrociniu d’una casa d’apuestes, la Real Sociedad, seya l’únicu que nun tiene una casa d’apuestes como patrocinador. El 89% de les sos socies y socios refugaron esti patrociniu que sí se da nos otros 19 equipos de la categoría. En segunda, a lo menos 16 equipos tamién tienen esti tipu de contratos de publicidá… Caro, nengún otru club tomó la iniciativa de refrendar democráticamente los sos patrocinios…y tampoco hemos escaecer que la primera y la segunda división tienen, anguaño, el patrociniu d’entidaes bancaries privaes. Forma parte too d’una mesma operación que concasa cola apaición nes nueses ciudaes y villes de llocales d’apuestes onde too ta pensao pa consumir y fomentar esta actividá: dende consumiciones y comida más barato a una estética que fai creyer a la nuesa mocedá que se puede tener un horizonte d’éxitu personal y económicu muncho meyor que’l que nos ufre esti sistema social nel que vivimos. Como dicíemos na nuesa campaña, cuando buscábemos patrocinios que nun fueren cases d’apuestes, somos un club vieyu pero mui pequeñu -nun esistimos pa estes empreses- pero por humilde que seyamos sí podemos imaxinar otru fútbol y otra sociedá en llibertá.

Ye bien ilustrativo que l’únicu equipu de primera división que consultó a la so afición pol patrociniu d’una casa d’apuestes, la Real Sociedad, seya l’únicu que nun tiene una casa d’apuestes como patrocinador

 -¿Y qué tal va la campaña de patrocinios?
-Nos últimos 4 años, dende que nos propunximos revitalizar esti vieyu equipu d’Uviéu qu’en 2019 cumple 90 años, venimos cuntando col sofitu de comercios, chigres y tiendines de proximidá qu’entienden la nuesa filosofía y qu’arimen l’hombru. Carniceríes, cafeteríes, peluqueríes, óptiques, tiendes de tatuaxes, de colchones, espacios deportivos y clíniques, cerveceríes y cerveza artesano, un tanatoriu, pubs y hasta editoriales n’asturianu fueron determinantes pa que güei podamos afrontar los mínimos qu’esixe la competición y poner un únicu equipu, ensin categoríes base, en xuegu. Les y los patrocinadores pueden echanos un gabitu dende poniendo un anunciu pequeñín nun cartel del partíu a anunciase na camiseta…y ye verdá que dende que fiximos esta llamada d’atención sobre la problemática de les cases d’apuestes hebo un repunte de persones y comercios que nos contautaron pa sofitar. Tamién te digo que güei falamos de les cases d’apuestes pero podríemos falar d’otros patrocinios que tenemos refugao ensin facer anuncia d’ello, por nun ser xustos pa colos nuesos socios y socies. Alcuérdome agora, especialmente, d’una aseguradora que ponía una cifra curiosa de perres si-yos dábemos entrada caliente pa cola nuesa masa social, qu’anda ente 150 y 200 socies añales. Evidentemente, nun aceutamos.

- ¿Qué ye lo más abegoso a la hora de sacar alantre un club deportivu?
-Quiciabes la xente nun lo sepa y piense que poner en marcha un equipu únicu na última categoría del fútbol federáu asturianu seya cosa d’axuntar 18 o 20 rapazos o rapaces y ponese a xugar cada domingu pero esto nun ye asina. L’equipu hai que lu inscribir, pagar por cada ficha de xugador (unos 123€ añales por persona), pagar los arbitraxes nos partíos de casa, facese cargu de desplazamientos, llavar ropa, mercar material deportivu…too ello supón munchos miles d’euros que, pa quien como nós y como tantos otros, nun tien una empresa detrás cola qu’esponsorizalo too, ye mui abegoso. A la fin, les perres salen de les campañes de socies y socios, de los patrocinadores públicos y privaos que t’ayuden a mercar materiales y a esparder la to actividá y de lo amañosa que seya la direutiva pa xestionar l’equipu, picando a toles puertes. 

- ¿Cunten con sofitu abondo per parte de les alministraciones publiques?
-La nuesa principal reclamación a l’alministración ye la necesidá de más campos de fútbol. Nós xugamos nel HFE Tensi, unes instalaciones de La Pixarra, que queden alloñaes de la ciudá y que nos saquen del entornu que vio nacer al club en 1929: la zona de la cai del Rosal. Asina, la principal carauterística histórica del Rosal FC ye la so componente popular y venceyada a esta zona del Uviéu Antiguu y, amás, la so falta d’un campu de referencia. El Rosal FC tiene xugao como llocal nel vieyu Tartiere, nel Seminariu, en San Llázaro…pero enxamás pudo decir que taba de quieto en nengún sitiu. Esto torga l’apaición d’un equipu femenín, por exemplu, pol que naguamos dende hai dos o trés temporaes, y que nun podemos sacar porque, lliteralmente, nun tenemos sitiu ónde ponelu a xugar y a entrenar. Col anterior equipu de gobiernu metimos una propuesta pa la creación d’un campu pal fútbol popular, nel que desendolcar proyeutos como’l nuesu, y la propuesta pasó ente les seleicionaes pa la segunda fase de la conceyalía de participación. Anguaño, anque yá tresmitimos esta demanda al nuevu alcalde en precampaña, queda pendiente siguir tomando en consideración esto porque’l fútbol -y especialmente’l femenín- yá ye una realidá a la qu’Uviéu, una ciudá con déficit d’esti tipu d’espacios deportivos, tien que facer xusticia.

 -Defínense como un club de fútbol popular, ¿en qué s’estremen d’otros?
-En realidá, abúltanos que nos asemeyamos a la mayoría de los de la nuesa contorna. Somos xente a la que-y presta’l fútbol y que xestionamos una institución deportiva humilde, coles sos dificultaes y aspiraciones, intentando facelo col meyor aciertu posible. Tolos equipos cumplen una función social asemeyada: xeneren ociu y una alternativa deportiva, creen texíu social, aporten a la comunidá... Quiciabes lo que nos pueda definir un poco más ye esi enclín por ser más esplícitos a la d’involucranos con causes que nos esmolecen na nuesa redolada. Solemos reivindicar cuestiones na esfera puramente deportiva; por exemplu, demandar precios populares y alcuerdos ente direutives pa tener entraes más barates de cara a fomentar el que les aficiones viaxen. Tamién nos presta torgar que nel ambiente futboleru se vean espresiones racistes, machistes, lgtbfóbiques o xenófobes.

 Solemos reivindicar cuestiones na esfera puramente deportiva; por exemplu, demandar precios populares y alcuerdos ente direutives pa tener entraes más barates de cara a fomentar el que les aficiones viaxen

No tocante a involucranos cola sociedá intentamos solidarizanos con causes que nos paecen xustes. Dende denunciar l’exodu de la mocedá asturiano -xugadores y entrenadores nuesos incluyíos-, a sofitar campañes a favor de les refuxaes o a concienciar socialmente escontra los fueos qu’amenacen el nuesu país tolos años como cuando, hai un par d’años, alborecimos con un cielu naranxa. Amás, solemos facelo too n’asturianu porque ye la llingua normal na que vivimos, xugamos y desendolcamos la nuesa actividá sociodeportiva. Amás, tamos en contautu con una bayura de clubs en tol estáu y fuera d’él que trabayen nel proyeutu del denomáu “fútbol popular”, que tienen un raigañu radicalmente democráticu nel que manden les aficiones, que refuga’l fútbol modernu nel que la socia y el sociu pasen a ser consumidores y que ta controláu y remanáu mercantilizando sentimientos y convirtiendo los clubs n’empreses. Exemplos d’esti bon facer son, por exemplu, el UC Ceares n’Asturies, el Ciudad de Murcia, l’Orihuela Deportiva, l’UD Ourense, el Tarraco FC, l’Atlético Club de Socios, el Xerez DFC, Unionistas de Salamanca CF, l’UD Aspense, el SD Logroñés o los creaos de recién Unión Popular de Palencia o Independiente de Vallecas, ente otros.

 -¿Por qué escoyeron Mocedá y Optimismu como llema?
 -En 1934, nel periódicu uvieín “El Carbayón” yá llamaben al Rosal FC “el más popular de los clubes xóvenes” d’Asturies y anunciaben que’l so lema yera esti: “Juventud y Optimismo”, como consecuencia de ser un club fechu pola xente más mozo de la cai uvieína. En 2016 dicíemos que’l Rosal FC tornaba a echar flor y apostamos por recuperar la historia y tradiciones d’un club que, d’otra manera, podía desapaecer. Asina, como parte d’esa conservación de les señes d’identidá de la institución, acoyimos de vuelta’l lema “#MocedáyOptimismu” que ye’l hashtag col que nos identificamos en redes y nel material deportivu. Y neses tamos, cumpliendo 90 años ya identificándonos cola mocedá. Y l'optimismu. 

---

---

---