El trabayu va salir el 27 de xunu y va presentase en conciertu el 4 de xunetu en Llanes
20 jun 2025 . Actualizado a las 11:13 h.El próximu vienres 27 de xunu verá la lluz Resollu, el tercer trabayu discográficu de la Banda de Gaites Llacín, que llega 17 años dempués del so últimu discu. La reconocida formación llanisca ta cuidando al máximu tolos detalles: l’álbum va editase en formatos CD y vinilu (yá disponible p'acutalo en musicasturiana.com, con entrega'l mesmu día del llanzamientu), y yá fixeron públicos dos singles d’adelantu: Resollu y Camín de Glasgow.
La presentación oficial va tener llugar el 4 de xunetu a les 22:00 hores en La Vega La Portilla (Llanes), con un conciertu especial que va xuntar a cerca de 100 músicos sobre l’escenariu. La velada promete ser una gran celebración gratuita de la música asturiana, onde, amás de los 60 miembros de Llacín, van participar una treintena de músicos y bailaores invitaos, incluyendo dalgunos de los nomes más representaos del folk asturianu. Completando'l cartelu van actuar los reconocíos grupos Felpeyu y Corquiéu.
Resollu ta compuestu por doce temes que, según esplica Vítor Carbajal, codirector de la Banda de Gaites Llacín, «ponen un pie na tradición y otru na modernidá; busquen un soníu más potente pa la banda ya incorporen propuestes sonores nueves que ruempen con tolo anterior». L’agrupación llanisca va editar esti nuevu trabayu tanto en CD como en vinilu, una apuesta destacada ya que ye la primer vegada en décades que se publica un discu de gaita asturiana nesti últimu formatu, lo que lo convierte en cuasique una pieza de coleccionista.A lo llargo de 53 minutos esti trabayu axunta dellos estilos, qu’asina presenta Carbajal: per un llau hai «sets de pieces propies del repertoriu tradicional asturianu con arreglos de folk acústicu, que tamién s’amesten a otres melodíes del Arcu Atlánticu». Tamién hai «composiciones nes que s’opta por otra llinia de soníu qu’inclúi baxu, batería y vientos metales».
Amás, el discu cunta coles collaboraciones de pernomaos homes de la música asturiana que formen parte d’agrupaciones como Llan de Cubel, Felpeyu, Corquiéu o Tuenda, ente munches otres: Lisardo Prieto (vigulín), Luis Nicolás (guitarra), Moisés Suárez (guitarra y bouzuki), Julio Rodríguez (bouzuki), Dani Álvarez (flauta travesa y bodhran), Pepín de Muñalén (flauta travesera), Miguel Herrero (viento metales), Israel Sánchez (batería), Sam Rodríguez (piano), Sergio Rodríguez (baxu y programaciones) y Xosé Antón Ambás (voz).