La iniciativa ye una collaboración cola asociación de traductores Verbéu
19 jun 2025 . Actualizado a las 11:34 h.Los Cines Embajadores Foncalada entamen el que va ser el primer ciclu de cine sotituláu n'asturianu, nuna iniciativa que programen en collaboración con Verbéu, l'asociación de traductores profesionales n'asturianu. Van ser cuatro les obres cinematográfiques emitíes mientres el mes de xunetu nun ciclu que creen «col compromisu d’averar el cine a la llingua asturiana y fomentar el so usu en nuevos contestos culturales y públicos». La entrada va tener un preciu de 3,50€.
La primer película va emitise'l 30 de xunu y va ser la obra india La lluz qu'imaxinamos, de Payal Kapadia. En Mumbai, la rutina de la enfermera Prabha vese alteriada cuando recibe un regalu inesperáu del so home, quien trabaya n'Alemaña. La so compañera de pisu Anu, más moza, intenta ensin ésitu atopar un llugar na ciudá pa intimar col so mozu. Un viaxe a una ciudá costera déxa-yos atopar un espaciu pa que los sos deseos se manifiesten.
El 7 de xunetu va proyectase Fallen Leaves, una película finesa de Aki Kaurismäki que yá se pudo ver nel Festival Internacional de Cine de Xixón nel añu 2023. Ansa ye soltera y vive en Helsinki. Trabaya con un contratu de cero hores nun supermercáu, abasteciendo los estantes; depués clasifica'l plásticu reciclable. Una nueche atópase por accidente col igualmente solitariu trabayador Holappa, un alcohólicu. Contra tou pronósticu y tracamundios, intenten construyir una relación. Como resultáu, Holappa llogra controlar la so adicción al alcohol.
El 14 de xunetu va ser el turnu de En Fanfare, una película francesa d'Emmanuel Courcol. Thibaut ye un director d'orquesta de sonadía internacional que viaxa pel mundu. Cuando s'entera de que ye adoptáu, afaya la esistencia d'un hermanu, Jimmy, un emplegáu d'un comedor escolar que toca'l trombón nuna banda de música nel norte de Francia. Al paecer nun coinciden en nada, sacante l'amor pola música. Al detectar les escepcionales habilidaes musicales del so hermanu, Thibaut propónse reparar la inxusticia del destín. Jimmy entós empieza a suañar con otra vida...
La postrer película del ciclu va ser La sustancia, de Coralie Fargeat y protagonizada por Demi Moore y que cunta con un Globu d'oru y un premiu Oscar. 'Tu, pero meyor en tolos sentíos'. Esta ye la promesa, un productu revolucionariu basáu na división celular, que crea un alter ego más mozu, más bellu, más perfectu. Tentada pola oportunidá Elisabeth Sparkle, una celebridá en decadencia, consume esti sueru del mercáu negru creando una versión remocicada de sí mesma, Sue, con efectos tan inesperaos como apavoriantes.