Namás el 9% del total de les actividaes programaes mientres los 5 díes son nesta llingua
18 jun 2025 . Actualizado a las 17:02 h.Entama la Feria del Llibru de Xixón güei miércoles, coles casetes asitiaes nel Paséu de Begoña y la Cai Tomás y Valiente, amás de los espacios habilitaos p'actividaes na Escuela de Comerciu y el Centru de Cultura Antiguu Institutu. Una feria que suma hasta 90 casetes y que sigue consolidándose dende que ñaciera nel añu 2017, entamada por llibreros y editores y con un cambéu nel añu 2020, cola entrada na dirección de Jaime Priede.
En total, van ser 100 les actividaes enmarcaes nos cinco díes que dura la feria asturiana (del 18 al 22 de xunu). Destaquen los nomes d'escritores de prestixu como Blue Jeans na estaya xuvenil, les asturianes Pilar Sánchez Vicente y Berta Piñán o Sara Mesa como autora renomada nos años últimos, ente tantos nomes reconocíos de la lliteratura asturiana y española.
Del total d'actividaes, namás un 9% son n'asturianu, un datu que contrasta cola bayura que vien esperimentando la lliteratura fecha n'asturianu na dómina actual. De la mesma, l'eonaviegu nun cunta con nengún actu na feria más importante d'Asturies y una de les más conocíes a nivel estatal. Un datu que coincide col otru gran eventu de la lliteratura d'Asturies, el POEX, donde namás el 13% de les actividaes fueron n'asturianu y nenguna foi n'eonaviegu. Autores como Pelayo Olái, Berto García, Xandru Martino, Marina Pangua o Eva Rami protagonicen les actividaes programaes de la FeLiX n'asturianu, presentando dalgunes de les novedaes más interesantes del primer semestre del añu no que cinca a la lliteratura asturiana.