L'Academia entama'l ciclu de «Alcuentros na ALLA» cola primer intervención del presidente Xosé Antón González Riaño
AGORA
Estes actividaes ñacen col so compromisu d'abertura a la comunidá
12 jun 2025 . Actualizado a las 12:51 h.El próximu 17 de xunu de 2025, a les 19:30 h, el presidente de la institución, Xosé Antón González Riaño, abre’l ciclu con «L’ALLA, camín del mediu sieglu nel llabor normativu y tutelar», onde, tres d’una pequeña presentación de la temática que se propón abordar, el públicu asistente va tener la oportunidá d’entrugar al académicu de la llingua asturiana sobre’l so trabayu y esperiencia nesa estaya del llabor de la institución.
Esta actividá enmárcase dientro del ciclu «Alcuentros na ALLA», un ciclu onde los y les académiques van ufrir al alderique les sos reflexones, análisis y vivencies en rellación cola so xera na Academia. En cada alcuentru, un miembru de la institución va proponer un tema concretu pa que’l públicu, d’un mou específicu y sistemáticu, vaya dirixendo la esposición, pente medies d’entrugues o comentarios concretos, a lo llargo d’una hora. La frecuencia prevista ye trimestral y el llugar d’alcuentru ye’l propiu llar de la institución.