El Festival 33600 & Mieres Underground 2025: la cita pal 13 y 14 de xunu qu´axunta asociacionismu y música na Plaza La Llibertá
05 jun 2025 . Actualizado a las 17:00 h.La vida cultural mierense nun sedría la mesma ensin el puxu asociacionista de la so xente. Son varies les asociaciones que ponen la so actividá al serviciu de la ciudadanía de la villa, compaxinando proyectos propios con iniciatives collaboratives como la qu´equí nos ocupa. N´esti casu vamos falar concretamente de dos d´elles, aprovechando l´esfuerzu que faen pa organizar a comuña´l Festival 33600 & Mieres Underground. Les asociaciones «Insonorizados» y «Mieres Underground» xunen fuercies pa fusionar dos proyectos nun festival de música qu´axunte nuna mesma fin de selmana´l puxu de los músicos llocales de la primera col músculu lloxísticu de la segunda.
El Festival 33600 & Mieres Underground 2025: dos díes de música na cai
El festival, que tendrá llugar los díes 13 y 14 de xunu na Plaza La Llibertá, ufre dos xornaes d’hermanamientu alrodiu de la música en directo, con dos propuestes distintes y un propósitu común: sacar la música a la cai. El cartel conxuntu cuenta con delles bandes asturianes y d’otros puntos de la península, ensin escaecer cuntar cola presencia de varios grupos mierenses. Darréu la programación completa:
Vienres 13. «33600». 21.30 - Ethiva (rock progresivu y sicodelia dende Mieres); 22.45 - Moura (rock progresivu, sicodelia con toques folk dende A Coruña); 00.00 - Repugnance (histórica banda de grindcore dende l'abismu mierense)
Sábadu 14. «Mieres Underground». 13.00 - Sesión vermú (mercadín y apertura de barra, con The Poligoners y Culebru DJ Set); 15.30 - Comida na cai (fideuá del restorán TC28, tarta de quesu con Estrella Michelín de Monte San Feliz y café d’especialidá de Cá Silverio); 17.00 -Sesión de tarde con DJ Flako Martini; 21.00 - Katovit (indie, noise rock madrilanu); 22.00 - Bronca (street punk de les cais de Xixón); 23.00 - Break the Senses (power trio malagueñu); 00.00 - Onza (HxC punk asturianu); 1.30 - 5.30 Fin de fiesta (nel Pub Kronos, con Tony the Stomper y Hu-Bo DJ Sets)
Los culpables: les asociaciones «Insonorizados» y «Mieres Underground»
L'asociación «Insonorizados» tien los sos anicios allá polos años 2006-2007, ñaciendo como rempuesta organizada a una serie de necesidaes que veníen detectándose na escena musical mierense. Ún de los principales oxetivos yera la organización sistemática de conciertos, que víase torgada na mayoría de los casos por falta de medios y d´espacios afayadizos. L’otru pegoyu de les reivindicaciones que facíen les persones venceyaes al mundu de la música na villa yera l´ausencia d´espacios adecuaos nos qu´ensayar y grabar los sos proyectos. El primer oxetivu fue algamándose al traviés de distintes propuestes como los festivales «Tronar Fest», «Mercurio Sound», «Música en la calle» y «33600». Toos estos formatos tuvieron bona acoyida y cierta continuidá nel tiempu, con varies ediciones y un públicu fiel. La parte de los llocales d´ensayu, una batalla que venía llibrándose yá dende los 90', algamóse cola concesión d’un espaciu na llocalidá vecina de La Peña: los Locales Mercurio son un centru neurálxicu del ecosistema musical mierense dende la so apertura en 2016.
El festival «Mieres Underground» tuvo la so primer edición en 2018, tovía baxo’l paragües de l’asociación «Skate Mieres», al axuntase varios amigos con pocos medios pero con munches ganes d’entamar conciertos nel entornu qu'arrodia la Ilesia de San Xuan. Esta iniciativa fue garrando forma hasta convertise na asociación del mesmu nome y siguió medrando n’apoyos baxo la protección de la emblemática estatua de Teodoro Cuesta que preside la plaza de La Pasera, hasta que l’espaciu quedó pequenu y hubo que treslladar los conciertos a l’actual llocalización na Plaza La Llibertá.
La confluyencia d’intereses de les dos asociaciones acabaría dando como resultáu a collaboraciones como la del Festival 33600 & Mieres Underground. Una conclusión evidente: xente del mesmu llugar con proyectos afines axuntándose pa facilitar y potenciar l’alcance de les sos actividades. Y esi ye’l mensaxe principal qu’estes dos asociaciones unvíen, de lo que trata tou’l movimientu asociacionista: xunir fuercies, compinchase pa llograr oxetivos; collaborar pa, xuntos, consiguir lo que por separtao resultaría muncho más complicao d’algamar.
Pa más información pueden visitase les RRSS de Mieres Underground o la web del Ayuntamientu de Mieres.