La valla esterior del recintu acueye una amuesa de 19 semeyes del fotoperiodista ñacíu en Xixón y que trabayó pa esti mediu
03 jun 2025 . Actualizado a las 18:39 h.El Muséu del Pueblu d’Asturies acaba d'instalar una nueva esposición na valla esterior del so recintu. Son diecinueve semeyes axuntaes sol títulu de «Homenaxe a Joaquín Bilbao (Xixón, 1959-2015), fotoperiodista», cuando se cumplen diez años del prematuru fallecimientu d'esti fotógrafu.
Joaquín Alonso Bilbao desenvolvió la so actividá profesional como periodista gráficu dende 1984, cuando empezó a trabayar en La Hoja del Lunes de Xixón pasando darréu per La Nueva España, La Prensa, La Voz de Asturias y El Comercio. Les fotografíes de Bilbao son d'un enorme interés pa documentar los acontecimientos y los tresformamientos qu'asocedieron n'Asturies, y especialmente en Xixón, dende finales de la década de 1980 hasta 2014. Ente estos sucesos, han destacase les movilizaciones de los trabayadores del sector industrial en defensa de los sos puestos de trabayu mientres la reconversión de la industria, los cambeos urbanísticos de Xixón o los eventos deportivos (fútbol, baloncestu, ciclismu o automovilismu, disciplina de la que yera gran aficionáu).
L'archivu de Joaquín Bilbao depositóse nel Muséu del Pueblu d’Asturies en 2021 por Maria Jesús y Sara Alonso Prieto, fíes del fotógrafu. Son más de 100.000 semeyes, na so mayoría negativos de 35 mm, archivaos a lo llargo de los años en 58 álbumes. Nesti depósitu inclúyese tamién l'archivu del fotoperiodista Ramón González Fernández (1961-1993) que la so familia donó a Bilbao tres la so repentina muerte. El muséu dixitalizó más de 5.000 fotografíes del fondu de Joaquín Bilbao, que tán disponibles pa la so consulta pública nel repositoriu municipal.
L'archivu de Joaquín Bilbao súmase a otros fondos fotoperiodísticos que caltien el muséu, como los de Constantino Suárez (1899-1983) o José Vélez (1931-2012), mesmo que los archivos fotográficos de diarios o revistes como La Prensa, de Xixón, El Progreso de Asturies, de L'Habana, y La Voz de Asturias, d'Uviéu, a los qu'hai qu'añedir les fotografíes cedíes polos fotoperiodistes Juan Carlos Tuero y Eduardo Urdangaray. Una selección d'esta colección fotoperiodística del muséu puede vese hasta'l 12 d'ochobre na esposición «Xixón. Epicentru Fotografia (1858-1992)», nel Palaciu de Revillaxixéu (Xixón).