La directora asturiana ta acabante d'estrenar la so película sobre un momentu desconocíu sobre'l padre del nacionalismu gallegu, Castelao
30 may 2025 . Actualizado a las 10:53 h.Ángeles Huerta (Xixón, 1974) vuelve a la pantalla de los cines tres O corpo aberto, llargometraxe premiáu con doce gallardones nos premios Mestre Mateo o meyor llargometraxe asturianu na 60 edición del Festival Internacional de Cine de Xixón.
Agora, estrena «Antes de nós», una película qu’afonda na figura de Castelao, l’intelectual gallegu que forma parte inescaecible de la hestoria moderna de Galicia, siendo consideráu’l padre del nacionalismu gallegu. La obra entró na so primer fin de semana nel top 13 d'asistencia na cartelera, algamando'l top 10 tanto'l domingu 25, como’l llunes 26 de mayu, magar d'estrenase namás en 17 llocales.
N’Asturies, Antés de nós va poder vese nos Cines Embajadores d’Uviéu dende esti mesmu fin de semana. P’afondar más na so perspectiva del séptimu arte, falamos cola directora.
—¿Cuáles son les primeres impresiones tres la estrena d’Antes de nós?
—Les primeres impresiones son magnífiques. El públicu gallegu ta respondiendo en masa y l'acoyida ye mui bona tamién en ciudaes como Madrid y Barcelona. Yo personalmente tenía daqué de mieu, porque nun ye una visión complaciente nin magnificadora de la figura de Castelao, que tien un nivel d'endiosamientu en Galicia malo d'esplicar n'Asturies. Polo xeneral, el públicu ta respondiendo entusiasta a la tenrura y desacralización qu'apurrimos. Un Castelao más humanu tamién ye más cercanu.
—La película articúlase en dos momentos clave: cuando exerce de médicu en Rianxo y el viaxe a Bretaña tres finar el so fíu, y siempres cola so muyer, Virxinia Pereira. ¿Por qué escoyer estos dos momentos?
—Porque son dos momentos d'estrema fraxilidá, y ye precisamente nos momentos vulnerables cuando los seres humanos perfilamos como les persones que realmente podemos ser. Hai una serie de decisiones étiques que'l protagonista toma nestos momentos de desamparu qu'en cierta midida prefiguren al Castelao políticu. Per otru llau, cinematográficamente ye siempre muncho más potente retratar a un ser que dulda, que llucha por atopar un camín en llugar de representar a un totem. Nun queríamos facer de Castelao una escultura andante.
—Ye una visión de Castelao dende l’intimismu, dalgo que choca cola obra del artista y nun son momentos tan conocíos. ¿Cómo foi esa documentación y cuanto hai de ficción nello?
—Nel cine too ye ficción, tamién nel cine documental. Nel momentu qu'escueyes y ordenes una serie de fechos, yá tas fabulando. Equí, de manera entá más evidente porque efectivamente falamos del Castelao más íntimu. Seya comoquier, hai documentos que nos averen a lo que pudo pasar y buelgues que dibuxen lo que pudo ser la esencia d'estos seres humanos: cartes, dibuxos… Pero hai que tener en cuenta que Castelao, en Galicia, más qu'un personaxe históricu ye una conversación abierta sobre munches coses.
—Virxinia Pereira ye parte del movimiento galleguista, pero foi siempre invisibilizada. ¿Cómo foi’l retu de representar esta figura na película?
—Foi más una obligación qu'un retu, y non yá por conciencia feminista. Somos seres relacionales, naide surde de la nada. Nesti sentíu, sería imposible retratar a Castelao ensin falar de la relación cola so compañera de vida, Virxinia Pereira.
—Magar de que nun son los momentos críticos de la so vida, faise memoria hestórica con esta obra. ¿Puede educase y enseñase’l pasáu al traviés del cine?
—Claro que se puede, pero sinceramente nun ye la mio intención. Nin nesta nin en nenguna otra de les mios películes. Creo que como artistes nun tenemos qu'informar, persuadir o educar a naide. La nuesa única responsabilidá ye la de trescalar, y a partir d'ello provocar una llume nel espectador que lu lleve a conocese meyor a sí mesmu.
—Como asturiana, ¿crees que podría facese una película d’esti perfil con dalgún personaxe de la hestoria d’Asturies?
—Creo que ye difícil. Hai que remontase bien tras hasta atopar un personaxe que cause un consensu tan absolutu p'asturianos de tol arcu políticu. Toi pensando, por casu, en Xovellanos. Pero Xovellanos ta mui alloñáu nel tiempu pa que los y les espectadores sientan esa identificación tan plena. Tolos y toles espectadores gallegues crecieron amando y respetando a Castelao, y eso nóse. Ye daqué íntimo.
—¿Cómo se ve dende la diáspora la situación del cine fechu n’Asturies?
Mal. Les ayudes son ridícules na so cuantía y los procesos poco tresparentes. Precisamos tamién una televisión pública más potente. El cine gallegu nun llegaría nunca a onde ta ensin el sofitu de la TVG, y ensin el so papel de cantera de técnicos y artistes. Per otru llau, ye una pena. Hai enforma talentu y munches hestories que cuntar. Selo porque dende va trés años participo nel FilmlabC6, un proyectu del ICAA y de SODECO. Hai xente y películes posibles mui necesaries, pero mui pocu sofitu. Ye una pena dende'l puntu de vista cultural, pero tamién ye qu'Asturies ta perdiendo un filón económicu de desenvolvimientu nesti campu.